Да 70-годдзя дацэнта кафедры беларускай мовы і літаратуры Уладзіміра Навумовіча.Імя Уладзіміра Аляксандравіча Навумовіча добра вядомае шырокай літаратурнай грамадскасці. Пісьменнік, літаратуразнавец, крытык, публіцыст, выкладчык роднай літаратуры, аўтар 9 манаграфій, вучэбных дапаможнікаў, кніг прозы, больш за 350 навуковых артыкулаў, папулярызатар гісторыі, літаратуры і культуры Беларусі, шчыры руплівец на ніве сучаснай літаратурнай навукі…
Падчас вучобы на аддзяленні беларускай мовы і літаратуры філфака БДУ сапраўдным духоўным бацькам, дарадцам, а пасля і сапраўдным сябрам стаў для Уладзіміра Навумовіча прафесар А. А. Лойка, які яшчэ на другім курсе прыкмеціў таленавітага юнака і павёў за сабою па «лабірынтах» беларускага літаратуразнаўства.
З 1973 г. – выкладчык, а з 1978 – дацэнт кафедры беларускай літаратуры філалагічнага факультэта. У 1982–1983 гадах У. Навумовіч загадвае кафедрай рускай мовы для замежных студэнтаў. З 1989 – загадчык кафедры беларускай мовы і літаратуры для прыродазнаўчых факультэтаў, а з 1989 па 2000 – загадчык кафедры беларусазнаўства філалагічнага факультэта. З 2003 па 2008 год працаваў саветнікам рэктара БДУ.
У 1990–1994 гг. У. Навумовіч узначальвае Міжнародную школу беларускай мовы, літаратуры і культуры, якую арганізаваў па ўласнай ініцыятыве. Слухачамі школы былі студэнты, навукоўцы-славісты, перакладчыкі з розных краін. Вынікам працы школы стала ўтварэнне навукова-культурных асяродкаў беларусазнаўства за мяжой – у Італіі, Германіі, Швейцарыі, Егіпце, Японіі і іншых краінах.
Cфера навуковых зацікаўленняў У. Навумовіча цесна звязана з пытаннямі развіцця беларускай літаратуры ХХ стагоддзя, літаратурнымі рухамі 20-х гадоў, этычна-канцэптуальнымі асновамі ўсёй беларускай паэзіі і прозы. Уладзімір Навумовіч належыць да тых нешматлікіх, на жаль, даследчыкаў літаратуры, для якіх існуе культ слова як у мастацкім творы пісьменніка, так і ва ўласным даследчым стылі.
Вядомы Уладзімір Навумовіч і як празаік. Яго асобныя апавяданні перакладзены на рускую і ўкраінскую мовы. У 2009 г. у часопісе «Наш современник» быў апублікаваны новы мастацкі твор пісьменніка – раман «Вобюлиманс» («С нами любовь»). Раман пабудаваны на канкрэтных жыццёвых фактах. У творы сапраўды шмат рэальных людзей, пазнавальных вобразаў з універсітэцкага асяродку.
Уладзімір Навумовіч – чалавек грамадскага патэнцыялу. Ён чытаў лекцыі па беларускай літаратуры ў Лонданскім універсітэце, шмат разоў удзельнічаў у моўных семінарах і ўсталёўваў навуковыя кантакты за межамі краіны. Уладзімір Аляксандравіч з’яўляецца на працягу многіх гадоў лектарам таварыства «Веды», арганізатарам і ўдзельнікам шматлікіх канферэнцый, студэнцкіх дыспутаў, літаратуразнаўчых і краязнаўчых віктарын, а таксама штогадовага свята студэнтаў-філолагаў у Вязынцы.
У спецыяльных лекцыйных курсах для студэнтаў «Беларусазнаўства» і «Універсітэтазнаўства» ім разглядаюцца праблемы фарміравання ўніверсітэтаў як цывілізацыйных феноменаў у свеце, гісторыя і ўмовы фарміравання БДУ як навуковага інстытута, а таксама розныя аспекты навучання, што сведчыць пра нязменны клопат у справе падрыхтоўкі маладых спецыялістаў. У 2011 г. асобным выданнем выйшла кніга «Універсітэт – феномен цывілізацыі», якая была адзначана дыпломам «Найлепшая кніга года» ў намінацыі «Краязнаўства».
Уладзімір Навумовіч вызначаецца ўменнем гаварыць, звяртаючыся да пачуццяў людзей, закранаючы іх душы і сэрцы. Сучасная літаратурная навука выходзіць на новыя далягляды, шукае новыя падыходы. Літаратуразнаўчая і педагагічная дзейнасць Уладзіміра Навумовіча самым непасрэдным чынам жывіць гэтыя намаганні, бо яна жывая, сучасная, запатрабаваная даследчыкамі і чытачамі.
Старшы выкладчык філалагічнага факультэта Таццяна Бельская
