ГАНАРОВАЙ граматай Савета Міністраў Рэспублікі Беларусь узнагароджаны прарэктар па навуковай рабоце Алег Івашкевіч. Ён адзначаны за шматгадовую плённую навукова-педагагічную дзейнасць, значныя дасягненні ў галіне навуковых даследаванняў і асабісты ўклад у іх практычную рэалізацыю.
Таксама Ганаровай граматай Савета Міністраў Рэспублікі Беларусь узнагароджана загадчыца
кафедры батанікі біялагічнага факультэта БДУ Валянціна Паліксенава. Яна адзначана за шматгадовую плённую навукова-педагагічную дзейнасць, значны ўклад у падрыхтоўку высокакваліфікаваных спецыялістаў.
* * *
НАДЗВЫЧАЙНЫ і Паўнамоцны Пасол Славацкай Рэспублікі ў Беларусі Міраслаў Мойжыта наведаў 14 лютага гістарычны факультэт. На сустрэчы з выкладчыкамі і студэнтамі абмеркоўваліся пытанні супрацоўніцтва Беларусі і Славакіі ў розных сферах.
* * *
АДУКАЦЫЙНАЯ дзейнасць БДУ была прадстаўлена з 26 па 28 лютага на 12-й міжнароднай спецыялізаванай выставе адукацыйных паслуг «Адукацыя і кар’ера». На нашым стэндзе была размешчана поўная інфармацыя пра факультэты і адукацыйныя інстытуты, спецыяльнасці і спецыялізацыі, правілы прыёму, кошты платнага навучання. Акрамя таго, экспазіцыя распавядала пра магчымасці кар’ернага росту, перападрыхтоўкі і пра курсы павышэння кваліфікацыі. Не засталіся без увагі і сёлетнія абітурыенты, якім супрацоўнікі БДУ аказалі кансультацыйную дапамогу ў выбары будучай прафесіі.
Паводле інфармацыі прэс-службы БДУ
