Адбылося! Нарэшце ў Студэнцкі гарадок БДУ прыйшла Вясна. У яе светлыя валасы, асляпляльная ўсмешка, грацыёзная хада і сапраўднае вясновае імя – Святлана. Другога красавіка ў Ліцэі Беларускага дзяржаўнага ўніверсітэта 37 цудоўных дзяўчат вылучылі адну-адзіную, самую выдатную, сонечную, далікатную і годную тытула “Міс Вясна–2014” Студэнцкага гарадка БДУ.
Шэсць вечара, Ліцэй БДУ. Дзверы ў глядзельную залу яшчэ зачыненыя, але на сцэне ўжо адбываецца магічнае дзеянне. Даўганогія красуні, мякка цокаючы абцасікамі, у апошні раз перад выступам рэпетуюць свае выхады: на твары нельга зазначыць ні кроплі хвалявання, але душу кожнай удзельніцы свідруюць эмоцыі.
Праходзіць трохі часу, і вуаля: дзяўчаты ўжо ў сваіх шыкоўных вячэрніх сукенках гатовыя да будучай бітвы, пры гэтым у кожнай за кулісамі свой міні-атрад, які падтрымлівае яе ва ўсім і дапамагае!
Сем вечара. Быццам перад хакейнай баталіяй усе сектары пабітыя і запоўненыя фанатамі, якія прагнуць убачыць сваіх фаварытак. Усе шарыкі надзьмутыя, усе крычалкі вывучаны, у паветры адчуваецца напружанне.
Такім чынам, шоу пачынаецца! Магутны гук, яркае святло, чароўныя вядучыя – усё апускае гледача ў чароўную атмасферу вясны і свята. Але калі на сцэну павольна, адна за адной, пачынаюць выплываць дзяўчаты-канкурсанткі ў вячэрніх сукенках, карціна, якая паўстае перад вачамі, ужо не проста выдатная, а грандыёзная! Заўзятары радуюцца, выкрыкваючы імёны сваіх улюбёнак, падтрымка залы проста каласальная!
Канкурсанткі выбудоўваюцца ў шэраг, гатовыя да першага выпрабавання – інтэлектуальнага конкурсу. Дзяўчатам неабходна было працягнуць мудрыя выслоўі вялікіх людзей, і яны паспяхова справіліся з гэтым. 
Настае чарга дэфіле ў чароўных, сапраўды вясновых дызайнерскіх уборах ад Кацярыны Колб. І тут нашы ўдзельніцы былі лёгкія і разняволеныя.
Далей канкурсанткі здзіўляюць гледачоў сваімі творчымі нумарамі і відэаролікамі: і смешныя, і экстравагантныя, і рамантычныя, і палымяныя, і кранальныя. Запомніліся пацешнае відэа і неверагодна праніклівы нумар Ксюшы Раеўскай з “сямёркі”, выклікаў буру станоўчых эмоцый Harlem Shake у танцы ад “шасцёркі”, сур’ёзную і ў той жа час рамантычную тэму ў сваім нумары закранула Насця Катурэнка з “двойкі”.
Услед за творчым нумарам дзяўчаты паўсталі перад гледачамі ў арыгінальных строях, якія яны зрабілі сваімі рукамі. Увогуле, што тут казаць, гэта трэба было бачыць!
Якая ж дзяўчына не марыць выйсці замуж?! І ў наступным дэфіле канкурсанткі прымяраюць на сябе вясельныя сукенкі, прадстаўленыя аўтарскай майстэрняй Lilium дызайнера Вірыям Пясэцкай. Гэта была проста беласнежная феерыя!
Трэба адзначыць, што ў гэты вечар акрамя дзяўчат на сцэне выступаюць выдатныя выканаўцы, пераможцы рэспубліканскіх і міжнародных вакальных конкурсаў, якія таксама падарылі гледачам станоўчыя эмоцыі і добры настрой.
Сказаць, што ў журы была цяжкая праца, значыць не сказаць нічога! Але вердыкт быў вынесены.
Пад апладысменты і авацыі залы з ганаровым званнем “Другой віцэ-міс” журы павіншавала Кацярыну Старавойтаву з шостага інтэрната. Зала замерла… “Першай віцэ-міс” становіцца… Ксенія Раеўская з інтэрната № 7″, – раздалося з мікрафона вядучага, і гэта значыць, што тытул “Міс Вясна–2014” Студэнцкага гарадка БДУ заваявала Святлана Якжык з адзінаццатага інтэрната!
Слёзы, кветкі, цукеркі, нашы прыгажуні фатаграфуюцца і абдымаюцца адна з адной. У такія хвіліны разумееш, што ўсё не дарма, што ўсё робіцца толькі дзеля гэтага моманту, моманту абсалютнага шчасця!
Трэба адзначыць, што ніводная канкурсантка не засталася без узнагарод. Тытул “Міс Артыстызм” заваявала Таццяна Лойка з інтэрната № 1, “Міс Грацыяй” стала Вікторыя Дралава з “дзясяткі”, “Міс Чароўнасць” – Вераніка Саўчанка з “чацвёркі”, Анастасія Катурэнка з інтэрната № 2 стала ўладальніцай тытула “Міс Творчасць”.
Адразу пасля конкурсу “Міс Вясна–2014” Святлана Якжык падзялілася сваімі ўражаннямі: “Зараз я адчуваю шмат эмоцый. Толькі што я патэлефанавала людзям, якія з самага пачатку больш за ўсіх падтрымлівалі мяне: маці і тату. Насамрэч мне вельмі спадабаўся конкурс. Спадабалася тое, што за кулісамі панавала сяброўская атмасфера. Я не чакала, што ўсе ўдзельніцы будуць такімі мілымі і цудоўнымі, мы вельмі згуртаваліся. Я ўдзячная ім і арганізатарам за тое, што атрымала асалоду ад самога конкурсу і перыяду падрыхтоўкі. Дзякуй усім вялікае!”
На такой кранальнай ноце завяршыўся неверагодны конкурс, які, будзем спадзявацца, стане не апошнім!
Рыгор КРАЎЧУК, Надзея КРАЎЧУК
На фота: 4. “Міс Вясна–2014” Святлана Якжык
Відэасюжэт з конкурсу прыгажосці глядзіце тут
