Універсітэт у жыцці кожнага новага студэнта – нібы новы горад у вандраванні. Гэта новыя ўражанні, новыя знаёмствы, новая атмасфера. Часам ва ўсёй велізарнай разнастайнасці лёгка заблукаць. Але БДУ не дазволіць сваім новым гараджанам згубіцца. Таму ўжо з першага верасня наш універсітэт, як гід, пачынае сваю экскурсію. Урачыстая лінейка перад рэктаратам і знаёмства з кіраўніцтвам універсітэта, са старшынямі грамадскіх арганізацый і прагулка па рэктараце – першы крок у знаёмстве з БДУ.
Аднак гэта толькі аглядная экскурсія. Каб даведацца пра ўсе славутасці, усе закуткі, адчуць жыццё свайго ўніверсітэта, кожнага першакурсніка запрашаюць на іх першае свята ў сценах БДУ – “Віват, студэнт!”.
Яшчэ да пачатку ўрачыстага канцэрта студэнцкія арганізацыі БДУ ярка і незвычайна знаёмяць першакурснікаў з пазавучэбным жыццём ва ўніверсітэце. Студэнцкі савет па якасці адукацыі ветліва сустракаў абдымкамі, студэнцкі саюз ратаваў усіх ад дрэннага настрою з дапамогай сваіх супергерояў, савет старастаў арганізаваў міні-конкурсы і раздаваў падарункі, а БРСМ пацешыў першакурснікаў традыцыйным флэшмобам.
Канцэрт пачаўся лазерным шоу пад бурныя авацыі глядацкай залы. Гэта быў своеасаблівы парад факультэтаў: іх знакі і назвы, створаныя рознакаляровымі прамянямі на сцяне Палаца спорту. Завяршыўся парад надпісам “Я паступіў у БДУ”.
А далей першакурснікам была прадстаўлена штогадовая праграма. Пад акампанемент барабанаў прайшлі “бацькі” – дэканы факультэтаў. Шэсце завяршыў Сяргей Уладзіміравіч Абламейка. Пасля вітальных слоў рэктара на сцэне з’явілася харавая капэла БДУ, якая выканала гімн універсітэта.
І вось яшчэ ўчарашнія абітурыенты ўрачыста прамаўляюць клятву першакурсніка. Сотні чалавек у адзін голас паўтаралі “Клянёмся!”, абяцаючы з годнасцю насіць ганарлівае званне студэнта. Тым часам быў вынесены вялікі студэнцкі білет – знак новага этапу ў жыцці маладых людзей.
Вакальная група “Галант” выканала песню “Універсітэт”. Павіншаваў першакурснікаў знакаміты калектыў БДУ “Крыжачок”, які заваяваў публіку далёка за межамі нашай краіны. На сцэну выходзілі адны з самых таленавітых студэнтаў і выпускнікоў БДУ: Юлія Гулько, ALEN HIT, група “Напалі”, група “Скай Тай”, Дзмітрый Нікановіч, Мікіта Найдзёнаў, Валянціна Паўлава, Юлія Пагосава і многія іншыя.
Але самымі доўгачаканымі гасцямі вечара былі беларускі выканавец Тэа, які прадстаўляў Беларусь на Еўрабачанні–2014, і музычная група Iowa, што падарыла свае найлепшыя песні новым студэнтам нашага ўніверсітэта. Пакуль студэнты атрымлівалі асалоду ад канцэрта, нам удалося задаць ім некалькі пытанняў.
Тэа:
— Ці ёсць розніца паміж выступамі перад сваёй звычайнай аўдыторыяй і студэнтамі?
— У падыходзе артыста, калі ён выходзіць на сцэну, не павінна быць ніякай розніцы. Нават калі ў зале тры чалавекі, ён павінен адпрацоўваць да канца і працаваць якасна, ад шчырай душы, ад усяго сэрца. Але што да публікі, то студэнты больш “драйвавыя”, дынамічныя, адкрытыя для зносін. Для мяне заўсёды вялікая радасць выступаць перад такой аўдыторыяй. Некаторыя трэкі з маёй творчасці супадаюць з густамі студэнтаў, таму я рады, што тут цёпла прымаюць. Гэта вельмі прыемна.
— Ці нахлынулі ўспаміны пра студэнцтва, калі выступалі на “Віват–2014”?
— Калі я быў студэнтам, я займаўся тым жа, чым і цяпер: выходзіў на сцэну і спяваў. Аднак і ў маім студэнцтве было шмат вясёлых і шчаслівых момантаў: пусты халадзільнік і слоік варэння, да прыкладу. Я памятаю, як мы яго з хлопцамі расцягвалі на цэлы тыдзень. Але наогул грэх скардзіцца, таму што я жыў у інтэрнаце. І з ежай не было праблем, бо можна было прыйсці да дзяўчат, якія заўсёды накормяць цябе смачным баршчом. Так, я ўспамінаю студэнцтва з самымі добрымі эмоцыямі, аднак вярнуцца туды не жадаў бы. Таму што гэта нейкая нявызначанасць: ты яшчэ не стаў на ногі, яшчэ не прафесіянал, гэта пераходны перыяд.
— Што вы ад сябе пажадаеце першакурснікам?
— Быць крэатыўнымі, цікаўнымі, імкнуцца да чаго-небудзь. І атрымліваць веды, таму што мы цяпер жывём у стагоддзе такога хуткага тэмпу жыцця, што потым можа быць позна дабіраць інфармацыю, якую ты выпусціў у студэнцтве. А наогул жадаю адважвацца, ірваць, ісці наперад!
АIOWA:
— Са сцэны вы сказалі, што жадалі б паступіць у БДУ. Гэта праўда?
— Праўда. Усё роўна, на які факультэт, таму што БДУ – гэта крута, гэта самая лепшая ВНУ краіны! Але паступіла я, як той казаў, па суседстве – у БДПУ. Мама вельмі жадала, каб я атрымала вышэйшую адукацыю. Але я была цалкам паглынута музычнымі праектамі, таму мне было складана вучыцца. Са мной мучыліся выкладчыкі, і я мучылася, і нам усім было дрэнна. Мне было складана вывучаць стараславянскую. Так што не паступайце дзеля вышэйшай адукацыі. Я адмучылася пяць гадоў і зразумела, што трэба паступаць туды, куды жадаеш. Я вучылася завочна, і паралельна ў мяне былі праекты. А я ж магла паступіць на вакал, пайсці ў мастацкую вучэльню. Цяпер я малюю і бяру прыватныя ўрокі, хоць магла адвучыцца ва ўніверсітэце. Сёння я казала студэнтам: калі вы паступілі, і вы хацелі сюды паступіць, і вам гэта падабаецца, тады вы крутыя. Вы прайшлі адбор. Вы найлепшыя з лепшых.
— Спадабалася выступаць перад студэнцкай публікай?
— Гэта была запаленая паходня, якая ўспыхвала ўсё мацней і мацней, і напрыканцы я нават больш за імі назірала, таму што гэта было ўзрушальна. Як штармавое мора. Гэта абсалютна наша аўдыторыя, наша на сто адсоткаў. Якая нас разумее, якая не бяздумна танчыць, а слухае песні, слухае тое, што мне хочацца ім сказаць. Я адчуваю, што яны гэта чуюць. Гэта разумная моладзь, яна думае.
Вікторыя ВІЦЮГОВА, Ганна ЗАНКОВІЧ
Фота Ганны Занковіч
Фотаздымкі з імпрэзы “Віват, студэнт!” глядзіце тут
Відэасюжэт пра мерапрыемства 
