На факультэце міжнародных адносін БДУ адбылася першая абарона магістарскіх дысертацый, выкананых на англійскай мове. Аўтарамі навуковых прац выступілі магістранты – грамадзяне Германіі, Кітая, Ірака, Лівіі, Казахстана. На працягу двух гадоў яны навучаліся ў англамоўнай магістратуры ФМА БДУ па спецыяльнасці “Гісторыя міжнародных адносін і знешняй палітыкі”.
Тэматыка дысертацый закранала цэлы шэраг актуальных праблем сучасных міжнародных адносін і знешняй палітыкі розных дзяржаў. У прыватнасці, магістранты даследавалі ўплыў падзей “Арабскай вясны” на міжнародныя адносіны на Блізкім Усходзе і ў Паўночнай Афрыцы, перспектывы расійска-кітайскага збліжэння, міжнароднае супрацоўніцтва ў справе забеспячэння бяспекі ядзерных матэрыялаў і інш.
Адзначым, у склад Дзяржаўнай іспытнай камісіі ўваходзіў намеснік дырэктара Дэпартамента замежнаэканамічнай дзейнасці МЗС Рэспублікі Беларусь, доктар палітычных навук Руслан Есін, які высока ацаніў узровень прадстаўленых прац.
ФМА БДУ плануе хуткім часам пашырыць спіс спецыяльнасцяў англамоўнай магістратуры і распрацаваць цэлы шэраг новых магістарскіх праграм для беларускіх і замежных навучэнцаў.
