Прэм’ер-міністр Ісламскай Рэспублікі Пакістан Наваз Шарыф стаў ганаровым прафесарам БДУ. Дыплом і мантыю ганаровага прафесара высокапастаўленаму госцю ўручыў 11 жніўня рэктар БДУ акадэмік Сяргей Абламейка. Ва ўрачыстай цырымоніі прынялі ўдзел першы намеснік міністра адукацыі Беларусі Вадзім Богуш, члены Савета БДУ, а таксама супрацоўнікі ВНУ.
Гэтага звання Наваз Шарыф удастоены за вялікі асабісты ўнёсак ва ўмацаванне і развіццё ўсебаковых сяброўскіх адносін паміж Пакістанам і Беларуссю.
Пасля ўрачыстай часткі прэм’ер-міністр Пакістана выступіў з невялікай прамовай. Наваз Шарыф распавёў пра гісторыю сваёй краіны, адзначыў, што Пакістан зацікаўлены ў прыцягненні інвестараў, і выказаў гатоўнасць развіваць супрацоўніцтва з Беларуссю ў розных сферах. «Belarus. Pakistan. Friendship», – рэзюмаваў ён.
Сяргей Абламейка адзначыў, што Наваз Шарыф надае вялікую ўвагу сістэме адукацыі Пакістана. Напярэдадні мерапрыемства ў Мінску былі падпісаны мемарандумы пра паразуменне паміж БДУ і Акадэміяй дыпламатычнай службы Міністэрства замежных спраў Пакістана, а таксама Інстытутам інфармацыйных тэхналогій COMSATS.
«Пакуль нашы адносіны недастаткова развітыя. Але мы спадзяёмся, што візіты на найвышэйшым узроўні будуць спрыяць больш цеснаму супрацоўніцтву», – сказаў рэктар БДУ. Ён адзначыў, што ва ўніверсітэце пакуль навучаецца толькі некалькі грамадзян Пакістана.
Пакістанскі прэм’ер папоўніў спіс вядомых дзеячаў высокага рангу, якія ўдастоіліся падобных ганаровых званняў БДУ. Сярод іх прэзідэнт Малдовы Пётр Лучынскі (2000), прэзідэнт Казахстана Нурсултан Назарбаеў (2000), міністр замежных спраў ПАР Нкасазана Дламіні-Зуму (2007), прэзідэнт Азербайджана Ільхам Аліеў (2009), старшыня Савета Федэрацыі РФ Валянціна Матвіенка (2012), прэзідэнт Туркменістана Гурбангулы Бердымухамедаў (2012) і прэзідэнт Індыі Пранаб Мукерджы (2015).
Аліна ДАШКЕВІЧ
