Да 20-годдзя ФМА быў прымеркаваны праект «Тыдзень са студэнцкімі арганізацыямі», у межах якога былі праведзены розныя мерапрыемствы.
Першымі пачала цешыць студэнтаў куратарская служба, кіраўніком якой з’яўляецца Крысціна Галаш, студэнтка 3 курса, і савет старастаў, якім кіруе яе аднакурсніца Ангеліна Юркова. 22 верасня на 11 паверсе была арганізавана забаўляльная праграма з музыкай, пад якую можна было патанчыць і пазнаёміцца з новымі людзьмі, і гульнёй «Кракадзіл». Студэнты выкарыстоўвалі ўвесь свой прафесіяналізм, было цікава як адгадваць, так і паказваць.
У якасці ўзнагарод раздавалі салодкія прызы: смачныя цукеркі і чупа-чупсы. У канцы ўсім падарылі шарыкі! А яшчэ зрабілі фота на памяць. Увогуле, мы пасмяяліся, паелі ласункаў, пазнаёміліся, зрабілі пару фота для «Інстаграм»… Дзень атрымаўся, ура!))
На наступны дзень мы разам адзначылі дзень нараджэння студэнцкага саюза БДУ, старшынёй якога сёлета стала студэнтка 4 курса спецыяльнасці «міжнародны турызм» Марыя Мшар. Дадзеная арганізацыя мае доўгую гісторыю: радуе факультэт ужо на працягу сямі гадоў! У сувязі з гэтым на 7 паверсе на вялікім перапынку мы арганізавалі мерапрыемства «Конкурсы і танцы з Аляксандрам Ачасавым»!
Вясёлы і яркі вядучы Аляксандр Ачасаў прымусіў усіх нас ад душы павесяліцца. Незвычайныя і вясёлыя конкурсы і не менш незвычайныя прызы: кубачкі з лагатыпам ФМА і бананы дасталіся самым годным і адважным удзельнікам.
Студэнты пажадалі студэнцкаму саюзу ФМА росквіту і больш ладзіць такіх вясёлых і незвычайных мерапрыемстваў!
24 верасня вялікі перапынак студэнты праводзілі з прафбюро ФМА. У праграме была вясёлая музыка, шумныя конкурсы, а таксама гонкі на скейтбордах. Усе пераможцы атрымалі памятныя прызы з сімволікай прафбюро. Пераможцу гонак на скейтбордах, якім стаў студэнт 2 курса Кірыл Бяльцоў, у якасці прыза была ўручана майка.
Вялікае дзякуй арганізатарам акцыі, старшыні прафбюро ФМА Аідзе Гуліевай і яе намесніку Марыі Гурко.
25 верасня адбылася доўгачаканая сустрэча з новым студэнцкім згуртаваннем – «Суполкай аматараў беларушчыны ФМА». На вялікім перапынку студэнты мелі магчымасць пазнаёміцца з вытокамі суполкі, вынікамі праведзенай у мінулым семестры апытанкі, планамі і перспектывамі, а таксама паўдзельнічаць у вясёлай віктарыне «Беларушчына». Сустрэча скончылася душэўнымі спевамі пад гітару. Кожны ўдзельнік атрымаў зарад бадзёрасці і прыемныя падаруначкі.
Мерапрыемства было праведзена лідарамі суполкі Багданам Хмяльніцкім і Цімурам Ходзіным.
26 верасня ва ўсіх студэнтаў ФМА была магчымасць паказаць сваю выдатную фізічную падрыхтоўку. Як усе мы ведаем, сапраўдны «ФМАшнік» павінен умець 3 рэчы: забаўляцца, нягледзячы ні на што; прыходзіць на пары пасля клуба і, вядома ж, бегаць хутчэй за ўсіх на 13 паверх! У сувязі з гэтым у той дзень прайшло вельмі важнае для кожнага «ФМАшніка» мерапрыемства: «Экстрэмальны забег Fire runner» з БРСМ, рухавіком якога на нашым факультэце з’яўляецца Дар’я Чупрова.
Удзельнікі стартавалі з першага паверха і беглі на 13, дзе іх чакалі прыўкрасныя дзяўчаты, якія раздавалі ўдзельнікам энергетычны напой Red bull. Хочацца адзначыць, што ўсе ўдзельнікі ў роўнай ступені паказалі сваё майстэрства. Прадстаўніцы далікатнага полу змагаліся нароўні з моцным! Дзяўчаты адважна пераадольвалі лесвічныя пралёты, аднак з невялікім адрывам пераможцам забегу стаў Стэфан Карасёў, які апярэдзіў свайго суперніка на 50 мілісекунд!
Праект «Выпрабавальнікі ўражанняў IMPRESSORS.BY» падараваў для пераможца сертыфікат ад падарункавага сэрвісу DAROO. Прыз уручаў намеснік дэкана ФМА Сяргей Карэлін, які адзначыў важнасць дадзенага мерапрыемства для факультэта, бо лесвіцы на ФМА былі тэмай для жартаў нават у старым корпусе на Акадэмічнай.
А ў дзень нараджэння факультэта, 1 кастрычніка, «Суполка аматараў беларушчыны ФМА» сумесна з бібліятэкай ФМА адкрыла секцыю буккросінгу.
Дарэчы, Багдан Хмяльніцкі стаў пераможцам праекта Future FIR, прысвечанага збору ідэй па паляпшэнні жыцця факультэта, які праводзіўся студэнцкай газетай «ФМОn-line», высунуўшы ідэю буккросінгу і паспяхова яе рэалізаваўшы.
Падводзячы вынікі ўсяго тыдня са студэнцкімі арганізацыямі, хочацца сказаць, што кожнае мерапрыемства пакінула след у сэрцы кожнага «ФМАшніка». Дзякуй усім арганізатарам, якія стварылі святочны настрой на факультэце. Спадзяёмся, што студэнцкія арганізацыі працягнуць дарыць усмешкі і радасць студэнтам і далей!
Дзякуй усім, хто правёў гэты вясёлы тыдзень з намі!
Са святам, любімы ФМА!
Дар’я БОГДАН
