На гэтым тыдні святкуецца Дзень маці. Гэта свята можна назваць адным з самых светлых, самых добрых і самых цёплых дзён у годзе. Бо менавіта ў гэты дзень мы ўшаноўваем і віншуем самых блізкіх і дарагіх жанчын кожнаму чалавеку на святле.
Мама… Адно слова, чатыры літары, а колькі любові і ласкі, колькі клопату, перажыванняў, колькі веры і надзеі стаіць за гэтым словам! Маму можна назваць адзіным чалавекам, які зразумее, які заўсёды будзе пра цябе клапаціцца, які будзе любіць цябе заўсёды, нягледзячы ні на што!
Беларускі дзяржаўны ўніверсітэт таксама не пакінуў без увагі гэта свята. Велізарная колькасць мерапрыемстваў, конкурсаў, канцэртаў праводзіцца як у рамках факультэцкай працы, так і ў маштабах усяго ўніверсітэта.
14 кастрычніка паштовыя канверты разляцеліся па ўсёй Беларусі – студэнты БДУ разам з пярвічнай прафсаюзнай арганізацыяй студэнтаў адправілі віншавальныя паштоўкі сваім мамам.
Любы ахвотнік мог паўдзельнічаць у акцыі “Павіншуем нашых мам разам!”, якая прайшла ў фае галоўнага корпуса БДУ. Для гэтага дастаткова было напісаць цёплыя словы і шчырыя віншаванні для сваіх мілых матуль, а прафкам студэнтаў даў пяшчотныя паштоўкі і канверты.
Студэнты загружалі ў Instagram сумеснае фота з мамай з хэштэгам #i_love_mom.
Дзень маці ў БДУ прайшоў насычана і ярка, застаецца толькі спадзявацца, што добрыя словы і прыемныя неспадзеўкі для нашых мам не скончацца разам са святам. Мілыя Матулі, дзякуй за жыццё! Вы – яго найлепшае ўпрыгожванне!
Упраўленне па выхаваўчай працы з моладдзю прапанавала студэнтам прыняць удзел у акцыі “#MothersDaywithBSU”. Сутнасць дадзенай акцыі простая, а сэнс яе і мэта неверагодна глыбокія. Навучэнцы alma mater змаглі прызнацца свайму самаму блізкаму і дарагому чалавеку ў любові, пазмагацца за званне пераможца і падзяліць радасць перамогі разам са сваёй мамай на святочным канцэрце ў Ліцэі БДУ.
Для таго, каб прыняць удзел у дадзенай акцыі, неабходна было выкласці ў сацыяльную сетку фота з хэштэгам #MothersDaywithBSU.
Акрамя таго, студэнты публікавалі ўласныя вершы, кранальныя прызнанні ў прозе пад фатаграфіямі з самымі роднымі і блізкімі людзьмі.
Пагадзіцеся, што нягледзячы на ўсю любоў да нашых мам, чамусьці нярэдка выходзіць так, што фатаграфій з імі атрымліваецца вельмі мала? І БДУ дапамог выправіць гэта.
14 кастрычніка УВРМ разам з саюзам жанчын БДУ падвялі вынікі. У намінацыі “Мама і я” па рашэнні журы найлепшым прызнаны здымак другакурсніцы філалагічнага факультэта Анастасіі Рабко, а ў анлайн-галасаванні перамагла трэцякурсніца фізічнага факультэта Анастасія Таболіч. У намінацыі “Я – мама” журы зацвердзіла пераможцам лабаранта батанічнага саду БДУ Алену Сапажкову. За выкладчыка кафедры камп’ютарнай лінгвістыкі і лінгвадыдактыкі факультэта сацыякультурных камунікацый Кацярыну Курчаву было аддадзена большасць галасоў у анлайн-галасаванні.
Усяго ў конкурсе прынялі ўдзел 55 студэнтаў і супрацоўнікаў БДУ. Ацэньваліся не толькі здымкі, але і подпісы пад імі – кароткія па форме і ёмістыя па змесце прызнанні ў любові самаму дарагому чалавеку – маме.
Дадзены фотаконкурс стаў вельмі карысным, многім людзям ён дапамог у чарговы раз успомніць самыя яркія і светлыя моманты, якія ў іх здарыліся разам з іх мамай. Шмат хто зноў прызнаўсы ў любові і падзякавалі самаму блізкаму і дарагому чалавеку – маме – за ўсё, што яна рабіла, робіць і працягвае рабіць для сваіх дзяцей.
І нягледзячы на тое, што пераможцаў у дадзенай акцыі толькі некалькі, усё адно станоўчыя эмоцыі атрымалі ўсе ўдзельнікі акцыі. Бо кожны з іх на фота і па жыцці знаходзіцца побач з найлепшым чалавекам на зямлі, з самым дакладным і адданым сябрам, з самай блізкай і роднай жанчынай – МАМАЙ…
Мухабад ХАДЖАМУРАДАВА
Відэа:
Пераможцы фотаконкурса:
Анастасія Таболіч , фізфак
Анастасія Рабко, філфак
Кацярына Курчава ФСК
Алена Сапажкова, біяфак
