Калі школьныя выпускныя вечары скончаныя, варта чакаць наплыву абітурыентаў у Белдзяржуніверсітэт. Ужо праходзяць этапы цэнтралізаванага тэсціравання, прыёмная кампанія вось-вось пачнецца. Пра тое, колькі чакаецца абітурыентаў, які план прыёму сёлета і чым ён адрозніваецца ад папярэдняга, растлумачыў дэкан факультэта даўніверсітэцкай адукацыі, адказны сакратар прыёмнай кампаніі Вячаслаў МАЛАФЕЕЎ.
Вячаслаў Малафееў
Цэнтралізаванае тэсціраванне
Каб для будучых студэнтаў здача тэстаў прайшла ў камфортных умовах, задзейнічана больш за 600 выкладчыкаў і супрацоўнікаў у якасці арганізатараў правядзення тэсціравання. На праходжанне ЦТ у БДУ запісаліся 17 594 абітурыенты, гэта на 24 % больш, чым летась. Такі рост выкліканы тым, што абітурыенты выкарыстоўваюць навізну гэтага года – магчымасць здаць 4 тэсты.
Адпаведна па краіне каля 40 % тых, хто паступае, зарэгістраваліся на 4 прадметы. «Але калі паглядзім на лічбы тых, хто не з’явіўся на працягу гэтых 4 дзён, то ўбачым, што колькасць нез’яўленняў таксама мае пэўныя паказчыкі, – кажа Вячаслаў Міхайлавіч. – Напрыклад, у параўнанні з мінулым годам на беларускую мову не з’явілася абітурыентаў у два разы больш. Хутчэй за ўсё нез’яўленні можна растлумачыць тым, што частка абітурыентаў да бягучага моманту адмовілася ад ідэі здаваць чацвёрты тэст і свае сілы сканцэнтравала на падрыхтоўцы трох прадметаў». Да таго ж размяшчэнне карпусоў нашага ўніверсітэта паблізу ад аўта- і чыгуначнага вакзалаў зручнае для іншагародніх выпускнікоў.
Асаблівасці плана прыёму
Змены ў плане прыёму залежалі ад магчымасцяў факультэтаў і ад папулярнасці спецыяльнасцяў у абітурыентаў, улічваліся вынікі прыёму мінулага года і рэкамендацыі Міністэрства адукацыі. План прыёму сёлета паменшаны на 177 месцаў у параўнанні з мінулым годам.
План прыёму на дзённае аддзяленне: 2164 месцы на бюджэтную форму і 1913 на платную. Тут змены наступныя:
– на бюджэтнай форме навучання скарочана 38 месцаў. Пад скарачэнне патрапілі больш за ўсё гуманітарныя і сацыяльна-эканамічныя факультэты (37 месцаў) і толькі адно месца скарацілі на прыродазнаўчанавуковых спецыяльнасцях. У большай ступені памяншэнне зачапіла Інстытут журналістыкі – 11 месцаў і юрыдычны факультэт – 10 месцаў. У выніку выйшлі на такую прапорцыю ў размеркаванні планавых месцаў: на дзённай бюджэтнай форме 66 % – гэта прыродазнаўчанавуковыя спецыяльнасці і 34 % – гуманітарныя і сацыяльна-эканамічныя.
– на платнай форме навучання скарочана 83 месцы. Тут адбылося наступнае зрушэнне: на прыродазнаўчанавуковыя спецыяльнасці дададзена 40 месцаў, а на гуманітарных і сацыяльна-эканамічных спецыяльнасцях скарочана 123 месцы. Тут самае вялікае памяншэнне на ІБМТ – 57 месцаў, ФМА – 23, эканамічным факультэце – 19, ДІКСТ – 18. Калі казаць пра суадносіны паміж прыродазнаўчанавуковымі спецыяльнасцямі і гуманітарнымі, сацыяльна-эканамічнымі спецыяльнасцямі, то на долю першых даводзіцца 21 %, а на долю апошніх 79 % ад лічбаў прыёму адпаведна.
У апошні час у краіне назіраецца тэндэнцыя скарачэння месцаў на завочнай форме навучання. У БДУ сёлета скарацілі 38 месцаў: на бюджэтнай форме – 30, на платнай – 8. У большай ступені скарачэнні закранулі біялагічны факультэт – 13 месцаў на бюджэтнай завочнай форме. Выніковы план прыёму на завочную форму складае: 255 – бюджэтная і 790 – платная форма навучання.
Скарочаны набор на другую вышэйшую адукацыю на 18 месцаў, і цяпер ён складае 210 месцаў. Тут прынята кардынальнае рашэнне пра тое, што эканамічны факультэт ужо не будзе прымаць на другую вышэйшую і робіць акцэнт на скарочаную форму навучання. Другая вышэйшая па эканамічных спецыяльнасцях у большай ступені будзе прадстаўлена на ІБМТ.
Неабходна адзначыць, што ў наш час назіраецца вялікая цікавасць да скарочанай формы навучання. Пашыраны спектр тых спецыяльнасцяў, куды могуць паступаць выпускнікі ўстаноў сярэднеспецыяльнай адукацыі, дзе вялася падрыхтоўка па інтэграваных планах. Той жа эканамічны факультэт на скарочаную форму навучання будзе набіраць 60 чалавек: 14 на бюджэт і 46 на платнае навучанне.
Троху павялічаны план прыёму на мэтавае навучанне – 44 месцы (38 летась). Калі раней мэтавы прыём вёўся толькі па педагагічных і журналісцкіх спецыяльнасцях, то цяпер гэты спектр пашыраны. Ёсць заяўка на спецыяльнасць «Аэракасмічныя радыёэлектронныя і інфармацыйныя сістэмы і тэхналогіі», на «Мытную справу» – 6 месцаў, для будучай атамнай электрастанцыі ёсць запыт на 4 месцы па спецыяльнасцях «Ядзерная і радыяцыйная бяспека» і «Хімія (навукова-вытворчая дзейнасць)».
Замежныя грамадзяне
Сёлета досыць вялікі выпуск на падрыхтоўчым аддзяленні БДУ – 180 чалавек. Асноўная частка выпускнікоў факультэта даўніверсітэцкай адукацыі арыентавана на далейшае навучанне ва ўніверсітэце. Тут адзначаецца нязменнасць: два апошнія гады на першую ступень вышэйшай адукацыі ў БДУ прымалі каля 400 замежных грамадзян, такая ж колькасць чакаецца і сёлета.
Яшчэ адна тэндэнцыя апошніх гадоў – гэта ўстойлівая цікавасць замежных грамадзян да навучання ў магістратуры: штогод у магістратуру паступаюць больш за 200 замежнікаў. У БДУ адкрыліся сумесныя магістарскія праграмы па схеме «Адзін плюс адзін»: адзін год ідзе навучанне ў БДУ, а другі ў ВНУ-партнёры, сярод якіх можна назваць Універсітэт Мітвайда (Германія), Хэнанскі ўніверсітэт (Кітай). Такія сумесныя магістарскія праграмы маюць добрыя перспектывы для развіцця.
Прагнозы
Вячаслаў Міхайлавіч разважае, што прыёмная кампанія ў параўнанні з мінулым годам у гэты раз будзе ісці больш дынамічна з-за ўведзеных двух дадатковых рэзервовых дзён правядзення цэнтралізаванага тэсціравання. Атрымліваецца, апошні тэст пройдзе 10 ліпеня, а ўжо 12 чысла пачнецца прыём дакументаў. «Думаем, прыём дакументаў будзе ісці не менш інтэнсіўна, чым гэта было летась, – лічыць адказны сакратар. – Вядома, самы вялікі наплыў абітурыентаў будзе ў перыяд з 12 па 17 ліпеня, калі будуць прымацца дакументы на бюджэтную форму і на спецыяльнасці, па якіх неабходна праходзіць уступныя выпрабаванні ва ўніверсітэце (як за кошт сродкаў бюджэту, так і на платную форму). Мы рыхтуемся бачыць прыкладна 1 000 абітурыентаў кожны дзень». Каб з такой колькасцю справіцца, абітурыентам прапануецца выкарыстоўваць такую форму, як асабісты кабінет, ён ужо адкрыты і гатовы да працы. З яго дапамогай будучы студэнт можа спакойна дома запоўніць усе дакументы, раздрукаваць і з імі прыехаць у БДУ. У гэты раз у асабістым кабінеце можна самастойна размясціць сваю фатаграфію, якая далей будзе выкарыстоўвацца ў базе абітурыентаў. Пасля падачы дакументаў у асабістым кабінеце абітурыент будзе бачыць бягучы прахадны бал і зможа рэальна ацаніць свае шанцы на паступленне.
У цэлым, як кажа Вячаслаў Міхайлавіч, быў сур’ёзна прааналізаваны ход кампаніі мінулага года, і пры арганізацыі працы сакратарыята прыёмнай камісіі ўніверсітэта і факультэтаў улічаны ўсе тыя пажаданні і рэкамендацыі, якія паступалі ад абітурыентаў і іх бацькоў.
Алёна ЛЯЎШЭНЯ
