Вялікая і дружная сям’я студэнтаў-актывістаў БРСМ БДУ на гэтым тыдні арганізавала ў гімназіях Мінска грамадска-асветніцкі праект «Універсітэт – твой крок у будучыню».
Студэнты распавялі не толькі пра ўніверсітэт, факультэты, але таксама і пра студэнцкае жыццё. Мерапрыемства пачалося з прывітання ўдзельнікаў праекта, затым была праца з псіхолагам, які распавёў гімназістам пра тыпы чалавечага характару і пра тое, як не хвалявацца ў розных сітуацыях. 
Нагляднай дэманстрацыяй гісторыі і сучаснасці Белдзяржуніверсітэта сталі паказаныя відэаролікі, падрыхтаваныя Медыяцэнтрам БДУ, а таксама прэзентацыя ўніверсітэта, якую прадставіў сакратар БРСМ БДУ Канстанцін Андрусевіч.
У рамках прэзентацыі праграм і мерапрыемстваў, якія праводзяцца ва ўніверсітэце, адмысловая ўвага была звернутая на праект «Студэнт БДУ на тыдзень», форма арганізацыі якога вельмі спадабалася гімназістам. Многія адразу ж захацелі адчуць на сабе жыццё сапраўднага студэнта. Завяршэннем стала дэманстрацыя хімічных і фізічных доследаў нашых студэнтаў.
Пасля асноўнай часткі праекта студэнты і гімназісты падзяліліся на дзве групы, дзе будучыя абітурыенты атрымалі адказы на ўсе свае пытанні пра факультэты, пэўныя спецыяльнасці, іспыты і г. д.
З упэўненасцю можна сказаць, што навучэнцы гімназій былі вельмі рады нашаму прыезду, дзяліліся сваімі чаканнямі і задавалі шмат пытанняў.
Нашы студэнты таксама былі рады знаёмству з дзецьмі, бо рэалізацыя дадзенага праекта – неацэнны досвед у арганізацыі важных для ўніверсітэта грамадска-асветніцкіх праектаў, асабліва калі іх правядзенне стала добрай традыцыяй. За гады рэалізацыі праекта мы ўжо дапамаглі многім абітурыентам вызначыцца з факультэтамі і спецыяльнасцямі, а таксама паставіць мэты на будучыню і настроіць на іх дасягненне.
