Універсітэт аб’ядноўвае ў навуковых гуртках 2,5 тысячы студэнтаў. Такіх аб’яднанняў па навуковых інтарэсах цэлых 125! Якія ж з іх найбольш поўна раскрываюць інтэлектуальны і творчы патэнцыял студэнтаў? Кампетэнтнае журы вызначыла іх у конкурсе “Найлепшы навуковы гурток БДУ”. Узнагароджанне адбылося 26 лістапада ў рамках Савета БДУ.
Конкурс накіраваны на развіццё інтэлектуальнага і творчага патэнцыялу адоранай моладзі, стымуляванне настаўніцкай дзейнасці, павышэнне якасці вышэйшай адукацыі, удасканаленне сістэмы падрыхтоўкі навуковых работнікаў вышэйшай кваліфікацыі, садзейнічанне прасоўванню навуковых ідэй, гіпотэз і інавацый студэнтаў, магістрантаў.
Па ўмовах конкурсу трэба было падрыхтаваць відэаролік пра дзейнасць навуковага гуртка. Камісія ацэньвала педагагічныя прыёмы і метады стымулявання пазнавальнай дзейнасці навучэнцаў, найважнейшыя навуковыя дасягненні і ідэі гуртка, гіпотэзы, інавацыі студэнтаў. Пераможцамі сталі гурткі біялагічнага і юрыдычнага факультэтаў.
Стогадовая гісторыя і прамоўніцкае майстэрства
У намінацыі “Найлепшы навуковы гурток БДУ ў галіне прыродазнаўчых навук” перамог гурток кафедры заалогіі біялагічнага факультэта.
Гурток з’явіўся разам з біялагічным факультэтам – у 1923 годзе, узначаліў яго Анатоль Фядзюшын. З 2016 года гуртком кіруе старшы выкладчык кафедры заалогіі Алег Сінчук. Асноўная мэта гуртка – аб’ядноўваць па інтарэсах. 
“Я імкнуся запрашаць тых студэнтаў, якія ў перспектыве прыйдуць да нас на кафедру ці будуць працаваць у студэнцкай навуковай лабараторыі. Праводжу шмат пасяджэнняў, паколькі мне ёсць чым падзяліцца і што распавесці”, – дзеліцца кіраўнік.
Сапраўды, выкладчык вучыўся ў Францыі, вывучаў акіянаграфію і статыстыку на высокім узроўні. Ва ўніверсітэце ён працягвае міжнароднае супрацоўніцтва: летась у гуртку выступалі спецыялісты з Латвіі і Польшчы. Цяпер запрошаныя госці – некамерцыйныя экалагічныя арганізацыі з навукова-папулярнай тэматыкай. “Я шукаю стажыроўкі для студэнтаў, імкнуся прапускаць усе магчымасці праз гурток. Некаторыя студэнты працуюць у паляўнічых гаспадарках, сочаць за анлайн-камерамі”, – кажа Алег Сінчук.
Пасяджэнні гурткоў – адкрытыя і закрытыя. На першыя прыходзяць усе ахвотнікі, яны анансуюцца ва “Укантакце” і прысвечаны займальным тэмам, звязаным з заалогіяй. На закрытых пасяджэннях студэнты вучацца афармляць навуковыя публікацыі, аналізаваць дадзеныя, разглядаюць частыя памылкі. “Мы вучымся прадстаўляць дадзеныя так, каб было зразумела неспецыялісту ў гэтай тэме. Чым далей навука рухаецца, тым складаней успрымаць чалавеку, які не ў тэме – занадта шмат вузкіх кірункаў. І, вядома, мы вывучаем прамоўніцкае майстэрства: як трымацца на сцэне, як гаварыць і будаваць аповед”, – каментуе кіраўнік гуртка.
Студэнты прыходзяць у першай палове года дзякуючы працы куратарскіх груп, ёсць у гуртку і праца са школьнікамі, па кансультацыю звяртаюцца нават абласныя школы. У планах – стварэнне YouTube-канала, дзе за 3-4 хвіліны можна будзе даведацца, пра што было пасяджэнне, і коратка зразумець яго тэму.
Анастасія Кучвальская, магістрантка: “Якія ёсць на факультэце навуковыя гурткі, мяне зацікавіла яшчэ на першым курсе. Бо ўжо на другім трэба было абраць кафедру, дзе неабходна будзе напісаць шэраг курсавых прац і дыпломны праект. Да выбару я падышла грунтоўна. Наведванне пасяджэнняў гуртка дазволіла вызначыць маю цікавасць да заалогіі. На пасяджэннях я даведалася шмат новага пра насякомых-шкоднікаў, пра загадкавых жывёл, якія патрапілі да нас з іншых краін, пра краявіднае багацце пчол. Падчас летняй практыкі ўсё склалася канчаткова: я яшчэ больш пераканалася ў тым, што вывучэнне жывёл – гэта маё.
Аб’ектам маёй навуковай цікавасці стаў маленькі матылёк – таполевая моль-стракатка. Цяпер я вучуся ў магістратуры, і мая цікавасць да казурак не знікла. Наадварот, узмацнілася! Сапраўды, дзівосны свет хаваецца ў нас пад нагамі! Адной з прычын поспеху гуртка, на мой погляд, з’яўляецца камандная праца. Немагчыма быць у некалькіх месцах адначасова. Але навука патрабуе ўсё і нават больш, таму мы адзін аднаму дапамагаем. Напрыклад, сабраць матэрыял і апрацаваць. І ўсё гэта мы можам даведацца на пасяджэннях гуртка, прысвечаных працы навуковай інфармацыяй.
Мне здаецца, гэта адзін з нашых сакрэтаў, якім хочацца з вамі падзяліцца. А яшчэ наш кіраўнік Алег Віктаравіч вялікі працаголік і захоплены сваёй працай чалавек. Гэта найлепшы прыклад для пераймання, я лічу”.
Раман Шулінскі, студэнт: “На кафедры заалогіі і гуртка я з першага курса, імкнуся наведваць усе пасяджэнні. У гуртку выступаюць цікавыя спецыялісты, ёсць займальныя кірункі па біяразнастайнасці. Маёй галоўнай цікавасцю стала біяінфарматыка, таму я пайшоў у СНДЛ біяінфарматыкі і малекулярнай эвалюцыі жывёл, дзе актыўна працую да сёння”.
Спецыялісты канстытуцыйнага права
У намінацыі “Найлепшы гурток БДУ ў галіне гуманітарных навук” лідарам стаў гурток па канстытуцыйным праве кафедры канстытуцыйнага права юрыдычнага факультэта. 
Кіраўнікі навуковага гуртка – доктар юрыдычных навук, прафесар, член-карэспандэнт НАН Беларусі, загадчык кафедры канстытуцыйнага права Рыгор Васілевіч і дацэнт кафедры Таццяна Маслоўская.
Гурток працуе больш за 15 гадоў – з 2002 года. Асноўная мэта гуртка – навучанне студэнтаў самастойнаму паглыбленаму вывучэнню тэорыі і практыкі канстытуцыйнага права. “Мы імкнёмся прышчапляць практычныя навыкі, тэорыю суправаджаем прыкладамі з практыкі”, – пераконвае Таццяна Маслоўская.
На сустрэчах студэнты абмяркоўваюць і дыскутуюць на тэмы, актуальныя для развіцця беларускай нацыянальнай прававой сістэмы. Праводзяцца відэаканферэнцыі з замежнымі ВНУ, нядаўна яе правялі з Далянскім тэхналагічным універсітэтам (Кітай). Гурток рэгулярна ладзіць выязныя пасяджэнні ў Савеце Рэспублікі, Палаце прадстаўнікоў, іншых дзяржаўных органах. Запрашае айчынных і замежных экспертаў. “Выкарыстоўваючы гэтыя формы працы, паглыблена вывучаем праблемы канстытуцыйнага права, праваўпрымяняльнай практыкі. Выяўляем і матывуем адораных студэнтаў, якія схільныя да навукова-даследчай дзейнасці, навучаем навыкам вядзення навуковых дыскусій”, – удакладняе Таццяна Маслоўская.
“Удзел у гэтым гуртку дапамагае студэнтам юрыдычнага факультэта развіваць свой далягляд, спазнаваць існыя праблемы і знаходзіць шляхі іх рашэння. Многія са студэнтаў потым займаюцца навуковай дзейнасцю, становяцца добрымі выкладчыкамі і навукоўцамі”, – лічыць прафесар Рыгор Васілевіч.
Пасяджэнне гуртка па канстытуцыйным праве ў фармаце Круглага стала (відэаканферэнцыі) з юрыдычным факультэтам МДУ імя Ламаносава (Расійская Федэрацыя) і Філіялам МДУ імя Ламаносава ў Ерэване (Рэспубліка Арменія) на тэму «Канстытуцыі Арменіі, Беларусі, Расіі як аснова палітычнай, эканамічнай і сацыяльнай мадэрнізацыі грамадства (напярэдадні 25-гадовага юбілею Канстытуцыі Беларусі і Расіі)»
Артур Касцюшка, стараста гуртка, студэнт 3 курса: “Мы праводзім дыскусіі па адвольных тэмах канстытуцыйнага права як у рамках факультэта, так і міжнароднага фармату праз скайп. Ходзім на экскурсіі ў дзяржаўныя органы, лекцыі. Я займаюся гэтым з-за цікавасці да пытанняў функцыянавання дзяржавы і грамадства. Гэта прыйшло з маёй любові да імперый мінулага: мне цікава зразумець, як яны працавалі. І, вядома, гэта пошук аднадумцаў”.
Віктар Сухапараў, магістрант: “Канстытуцыйнае права палюбілася яшчэ з першага курса, бо гэта ўнікальная галіна права, якая змяшчае як міжнародна-прававыя стандарты, так і публічныя і прыватныя пачаткі нацыянальнай прававой сістэмы. Гурток па канстытуцыйным праве з’яўляецца полем для навукова-практычных дыскусій і збірае зацікаўленых навуковых супрацоўнікаў, а таксама студэнтаў, магістрантаў і аспірантаў. На пасяджэннях адбываецца прадуктыўнае ўзаемадзеянне мудрых настаўнікаў і дапытлівага маладога пакалення ў сяброўскай атмасферы. Магчыма, у гэтым і ўвесь сакрэт таго, чаму туды хочацца хадзіць увесь час, працуючы ў сваё задавальненне”.
Абодва гурткі захапляюць сваёй плённай працай і захопленасцю справай – выдатны прыклад моладзевай навуковай супольнасці ў БДУ.
