Гэты год стаў вельмі насычаным для нашага ўніверсітэта. Падсумоўваючы яго вынікі, мы пагутарылі з Дзмітрыям КУРЛОВІЧАМ, загадчыкам кафедры глебазнаўства і зямельных інфармацыйных сістэм геаграфічнага факультэта БДУ. Даведаліся пра дасягненні студэнтаў і супрацоўнікаў. Таксама пра тое, што плануецца адкрыць магістарскую праграму па ГІС на англійскай мове і павялічыць публікацыйную актыўнасць выкладчыкаў.
Дзмітрый Курловіч з дыпломам імя А. Н. Сеўчанкі ў галіне прыродазнаўчых навук
– Гэты год стаў для нашай кафедры юбілейным. У верасні мы адзначылі яе 85-годдзе правядзеннем чатырохдзённай міжнароднай навукова-практычнай канферэнцыі «Глебы і зямельныя рэсурсы: сучасны стан, праблемы рацыянальнага выкарыстання, геаінфармацыйнае картаграфаванне». Да юбілею кафедры чатыры супрацоўнікі былі заахвочаны БДУ, два – Дзяржаўным камітэтам па маёмасці Рэспублікі Беларусь, тры – Інстытутам глебазнаўства і аграхіміі НАН Беларусі.
З іншых дасягненняў хацелася б адзначыць пятую запар перамогу СНДЛ кафедры «ГІС-лабараторыя» ў конкурсе СНДЛ БДУ, правядзенне кафедрай Рэспубліканскага навукова-практычнага семінара студэнтаў і маладых навукоўцаў «ГІС-тэхналогіі ў навуках пра Зямлю–2018» і ў яго рамках конкурсу геаінфармацыйных праектаў студэнтаў і аспірантаў УВА Рэспублікі Беларусь. Студэнты кафедры атрымалі перамогу ў міжнародным конкурсе геаінфармацыйных праектаў прыродаахоўнай тэматыкі. А супрацоўнікі кафедры былі адзначаны прэміяй імя А. Н. Сеўчанкі ў намінацыі «Адукацыя».
У наступным годзе перад нашай кафедрай у навучальнай сферы стаіць задача распачаць працу па адкрыцці магістарскай праграмы па геаінфармацыйных сістэмах на англійскай мове. Мяркуецца распрацаваць навучальны план, падрыхтаваць навучальныя праграмы дысцыплін. Калі казаць пра навуковую сферу, то асноўная задача – гэта павышэнне публікацыйнай актыўнасці супрацоўнікаў кафедры ў часопісах, якія індэксуюцца Scopus і Web of Science.
Алёна ЛЯЎШЭНЯ
Відэа:
