Усе яны пераможцы агульнаўніверсітэцкага конкурсу ў намінацыях «Найлепшы выпускнік», «Зорка БДУ» і «Студэнцкі лідар».
Студэнцтва сабралася 23 чэрвеня ў Ліцэі БДУ, каб атрымаць заслужаныя дыпломы ад кіраўніцтва ўніверсітэта і дэканаў факультэтаў. Праз прысутных са словамі падзякі і пажаданнямі поспеху ў прафесійным жыцці да ўсіх выпускнікоў універсітэта звярнуўся рэктар БДУ Андрэй Кароль.
Ён адзначыў індывідуальнасць кожнага студэнта, чыя паспяховая дзейнасць з’яўляецца гонарам універсітэта: «Я глыбока перакананы, што чалавек нараджаецца не “чыстым лістом”, які выкладчыкам неабходна запоўніць, а ўнікальнай асобай, з уласцівымі ёй задаткамі. Трэба толькі стварыць пэўныя ўмовы, каб дапамагчы студэнту іх раскрыць і рэалізаваць. Сёння наш універсітэт стаў тым адзінным месцам, дзе зусім розныя місіі, інтарэсы, асаблівасці аб’яднаны ў адну вялікую супольнасць людзей. Гэта надае асаблівую і непаўторную атмасферу БДУ». Рэктар нагадаў кожнаму памятаць пра тое, што ўніверсітэт заўсёды адчынены для сваіх выпускнікоў, і пажадаў не згубіць сябе ў гэтым велізарным, перапоўненым інфармацыйным шумам свеце.
Павіншаваць выпускнікоў з гэтай урачыстасцю запрасілі таксама беларускую групу VAL, спявака Юрыя Аляхно і студэнцкую зорку Вераніку Цубікаву.
Выпускнікі падзяліліся сваімі ўражаннямі ад навучання ў БДУ.
Дар’я Васільева, Інстытут бізнесу БДУ:
– Чатыры гады таму я загадала жаданне, каб студэнцкія гады былі самымі запамінальнымі ў маім жыцці, і гэта сапраўды так! Я ўдзячная БДУ за цудоўных выкладчыкаў, адукацыю, выдатнае кола зносін, за справу, якой хачу займацца ўсё жыццё, і чалавека, з якім я мару гэта жыццё правесці.
Ягор Багдашоў, факультэт сацыякультурных камунікацый:
– Гэтыя пяць гадоў – самыя цікавыя і хуткія, драйвовыя, «смачныя». Дзякуючы выкладчыкам, у галаве я выношу веды, у сэрцы –вясёлыя паездкі, новыя знаёмствы, уменне трымацца ў грамадстве. Самае галоўнае для мяне – быць патрэбным, цікавым, дасведчаным.
Дыяна Куліч, факультэт прыкладной матэматыкі і інфарматыкі:
– Маё знаёмства з БДУ пачалося з ліцэя, і я ўдзячная альмаматар за 6 выдатных гадоў. Тут я знайшла велізарную колькасць сяброў, сваю каманду КВЗ. Змагла сябе рэалізаваць, універсітэт дае шырокія магчымасці. Дзякуй выкладчыкам, якія ўкладваюць у нас душу, каб развіць як асоб, спецыялістаў. Гэта для мяне вельмі каштоўна.
Усяго сёлета дыплом БДУ атрымалі звыш 4300 маладых людзей, з якіх 3537 скончылі дзённае аддзяленне і 780 – завочнае.
Надзея МАРХЕЛЬ
