Гістарычная памяць, міжнародныя праекты, творчыя актыўнасці, патрыятычнае выхаванне, новыя пляцоўкі для правядзення моладзевых мерапрыемстваў, развіццё студэнцкага сумеснага кіравання, а таксама чэргі ў сталовых – гэтыя тэмы абмеркавалі студэнты БДУ на сустрэчы з кіраўніцтвам ВНУ.
Мерапрыемства адбылося 3 снежня на пляцоўцы спартыўна-аздараўленчага комплексу «Брыганціна БДУ» (г. п. Радашковічы) у рамках моладзевага студэнцкага форуму «Твой час – твая магчымасць». Зносіны прайшлі ў фармаце адкрытага мікрафона з удзелам рэктара БДУ Андрэя КАРАЛЯ, прарэктара па выхаваўчай рабоце і сацыяльных пытаннях Ганны БАКУН, начальніка ўпраўлення па выхаваўчай рабоце з моладдзю Кацярынай ЗУЕВАЙ. Ганаровым госцем стаў першы сакратар Цэнтральнага камітэта ГА «БРСМ» Аляксандр ЛУК’ЯНАЎ. Студэнцтва прадставілі каля 200 актывістаў БРСМ БДУ.
Нагодай для сустрэчы паслужыла 20-годдзе моладзевай арганізацыі. Гэта знакавая дата ў гісторыі БРСМ БДУ. За гэты перыяд пры яе ўдзеле ў вядучай ВНУ праведзены мерапрыемствы патрыятычнага, адукацыйнага і культурнага значэння. Гэта камандна-спартыўны конкурс для першакурснікаў «Кубак першакурсніка БДУ», фестываль студэнцкага жыцця FEST, грамадска-асветніцкая акцыя «Універсітэт – твой крок у будучыню», студэнцкі турысцкі злёт «Высокі бераг» і інш. Сёння арганізацыя вядзе дзейнасць па васьмі напрамках. Яна актыўна спрыяе занятасці студэнтаў, арганізоўвае валанцёрскую работу, ахову правапарадку, фандрайзінг і інш. Цяпер у БРСМ БДУ налічваецца больш за 10 тысяч студэнтаў.
Пра дасягненні, досвед і найбліжэйшыя планы арганізацыі распавялі гасцям студэнты БДУ. У той жа час юнакоў і дзяўчат цікавіла меркаванне і парады кіраўніцтва ВНУ наконт паляпшэння работы БРСМ, бачанне яго ролі ў рабоце з моладдзю з улікам новых выклікаў і палітычнай сітуацыі ў свеце. Удзельнікі сустрэчы ўзнялі тэмы важнасці гістарычнай памяці, стварэння новых пляцовак для развіцця студэнцкага сумеснага кіравання.
Андрэй Кароль падкрэсліў, што без гістарычнай памяці не будзе ні сучаснасці, ні будучыні. Адказваючы на пытанне пра студэнцкае сумеснае кіраванне, рэктар адзначыў, што важна стварыць асяроддзе для моладзі, дзе яна зможа самарэалізавацца. «Гэта тая платформа, дзе студэнт будзе не „слухачом“, а „творцам“, „стваральнікам“ самога сябе», – рэзюмаваў ён.
Напрыканцы адкрытага дыялогу Андрэй Кароль выступіў з пажаданнем для юнакоў і дзяўчат. «Глядзіце на дасягненні не як на рысу, вынік і фінальную мяжу, а як на прыступку, каб зрабіць крок у будучыню. Перамагайце сябе і знешнія абставіны», – пажадаў удзельнікам форуму кіраўнік ВНУ.
Заключным этапам мерапрыемства стала цырымонія ўзнагароджання актывістаў БРСМ БДУ падзякамі і граматамі ўніверсітэта за іх уклад у развіццё арганізацыі і моладзевага руху ў ВНУ. Таксама новым членам пярвічнай арганізацыі Аляксандр Лук’янаў уручыў членскія білеты.
Праграма форуму была насычанай і разнапланавай. Каманды факультэтаў загадзя стваралі відэа, візітоўку каманды, творчы нумар і праект для аднаго з падраздзяленняў пярвічнай арганізацыі, каб стаць найлепшай «пярвічкай» у юбілейны год арганізацыі.
У першы дзень пасля прыезду і рассялення ўдзельнікаў па карпусах з імі правялі трэнінг па камандаўтварэнні: тут студэнты даведаліся, як павысіць выніковасць і эфектыўнасць работы ў камандзе, як палепшыць якасць міжасобасных адносін. На секцыі «Гайд для валанцёра: сучаснае добраахвотніцтва» кіраўнік валанцёрскага руху БРСМ БДУ, камандзір валанцёрскага атрада «Абдымкі» Яўгенія ЧЭРКАС расказала пра сучасны падыход да вывучэння добраахвотніцкай дзейнасці. Асабліва яна надала ўвагу разуменню таго, як стаць сапраўдным валанцёрам і не баяцца эмацыйнага выгарання. Пра тое, як распрацаваць стратэгіі прасоўвання брэндаў у сацыяльных медыя, як весці акаўнт у сацсетках, стварыць кантэнт і камунікацыю з карыстальнікамі, паведаміла smm-спецыяліст Пелагея ТАЛСТАЯ на секцыі «Сацыяльныя медыя: кантэнт, трэнды, развіццё». Сваім вопытам падзяліўся і камандзір моладзевых атрадаў аховы правапарадку БРСМ БДУ 2015–2020, камандзір тэрытарыяльнай дружыны БДУ Аляксей ВІТОШКІН на секцыі «МААП БРСМ БДУ: патрыёты на варце парадку». Аляксей расказаў, як быць адказным за бяспеку на мерапрыемствах і працаваць у сістэме аховы правапарадку, а на секцыі «Штаб працоўных спраў БРСМ БДУ: старт працоўнага стажу» камандзір штаба Анастасія ЛЯХОВІЧ і камісар штаба Павел ГЛУХІХ – пра студэнцкія атрады і дзе будучым спецыялістам можна зарабляць. Пра стварэнне праектаў, ажыццяўленне сваіх ініцыятыў і лідарства паведаміла намеснік сакратара БРСМ БДУ Юлія КУНАХАВЕЦ. А сакрэтамі, як авалодаць і правільна выкарыстоўваць галоўны інструмент лідара – аратарскае мастацтва, падзялілася выпускніца філалагічнага факультэта, майстар аратарскага мастацтва Арына АНІСАВА ў секцыі «Праектная дзейнасць = мастацтва пераконваць».
Пасля вячэры стартавала інтэлектуальна-ролевая квест-гульня «Твой час настаў». Каманды праходзілі 7 пікетаў, кожны з якіх быў скіраваны на згуртаванне каманд, уменне слухаць і чуць адзін аднаго, праяўляць сваю кемлівасць і развіваць soft skills. Па выніках праходжання найлепшай у квест-гульні стала каманда БРСМ факультэта журналістыкі. Першы дзень форуму завяршыўся караоке-батлам, які «сагрэў» удзельнікаў пасля праходжання заданняў на зімовым паветры.
У першай палове другога дня на тэрыторыі спартыўна-аздараўленчага комплексу была арганізавана працоўная акцыя «За Справу!». На ёй актыў БРСМ прыбіраў тэрыторыю, прылеглую да Алеі 12 Герояў Савецкага Саюза, лёс якіх цесна звязаны з Беларускім дзяржаўным універсітэтам. Пасля заканчэння акцыі студэнты, сумесна з прарэктарам па выхаваўчай рабоце і сацыяльных пытаннях Ганнай БАКУН і начальнікам упраўлення па выхаваўчай рабоце з моладдзю Кацярынай ЗУЕВАЙ, усклалі кветкі да мемарыяльнага знака, закладзенага ў пачатку алеі.
Другая палова дня была прысвечана творчым работам удзельнікаў. Каманды прапанавалі свае відэаролікі і візітоўкі, а пасля вячэры – і творчыя нумары. У намінацыі «Найлепшы творчы нумар» перамогу атрымала каманда БРСМ юрыдычнага факультэта. А найлепшым відэаролікам стала работа механіка-матэматычнага факультэта. Таксама былі выбраны пераможцы намінацый «Найлепшая жаночая роля» (Алена КАРАЛЕНКА з механіка-матэматычнага факультэта) і «Найлепшая мужчынская роля» (Юсіф ЭЙВАЗАЎ з факультэта геаграфіі і геаінфарматыкі). Пасля насычанага падзеямі другога дня форуму ўдзельнікаў чакала тэматычная дыскатэка, на якой каманды віншавалі БРСМ БДУ творчымі нумарамі, дарылі падарункі і частаваліся святочным тортам.
Галоўнай падзеяй трэцяга дня стала абарона праектаў. Інавацыйная і праектная дзейнасць з’яўляецца неад’емнай часткай БРСМ: конкурс «100 ідэй для Беларусі», розныя акцыі грамадзянска-патрыятычнага выхавання сталі візітнай карткай арганізацыі. Усяго на конкурс былі пададзены сем праектаў, якія адпавядаюць пэўным напрамкам дзейнасці БРСМ. Юрыдычны факультэт сумесна з фізічным прадставілі праект для штаба працоўных спраў па стварэнні камісіі па асвеце студэнтаў у юрыдычнай сферы і аказанні юрыдычнай дапамогі. Факультэт філасофіі і сацыяльных навук і механіка-матэматычны факультэт прадставілі праект для службы фандрайзінгу БРСМ пад назвай «Дабрачыннае спатканне». Яго сутнасць заключаецца ў стварэнні агульнай базы спонсараў, да якіх маглі б звяртацца факультэты пры планаванні сваіх мерапрыемстваў, з якімі маглі б дзяліцца сувязямі і наладжанымі кантактамі. Хімічны факультэт і факультэт геаграфіі і геаінфарматыкі прадставілі валанцёрскі праект па азеляненні аб’ектаў універсітэта. Для прэс-службы БРСМ эканамічны і біялагічны факультэты прапанавалі праект навучальных трэнінгаў. Студэнты ваеннага факультэта прадставілі праект спецыяльных сходаў з моладдзю, у якіх абмяркоўвалася б іх прававая адказнасць, а студэнты факультэта журналістыкі – выязны адукацыйны форум «Апошні герой», сутнасць якога ў магчымасці супрацоўнікаў МААП з карысцю адпачыць ад сваіх абавязкаў на свежым паветры. Пераможца конкурсу праектаў – квест-гонка пад назвай FlashRace, падчас якой каманды выконваюць заданні ў карпусах розных факультэтаў і такім чынам знаёмяцца з іх спецыфікай. Гэта сумесны праект гістарычнага факультэта і зборнай каманды ФМА і МДЭІ імя А. Д. Сахарава для культурна-масавага напрамку БРСМ. Яго асаблівасць заключаецца ў выкарыстанні сучасных тэхналогій дапоўненай рэальнасці і камп’ютарных гульняў. Асноўнымі мэтамі ініцыятывы сталі развіццё стваральнай актыўнасці студэнцкай моладзі, стымуляванне цікавасці да грамадска-значнай дзейнасці, стварэнне ўмоў для творчай рэалізацыі студэнтаў, умацаванне міжфакультэцкіх сувязяў, папулярызацыя дзейнасці Беларускага рэспубліканскага саюза моладзі, а таксама павышэнне ўзроўню лагічнага мыслення і паглыбленне ведаў гісторыі БДУ.
Пасля падліку галасоў журы аб’явіла пераможцам конкурсу «Стань найлепшым!» і ўладальнікам кубка каманду гістарычнага факультэта. Другое месца заваявала каманда факультэта філасофіі і сацыяльных навук, а трэцяе – каманда юрыдычнага факультэта.
Па словах студэнтаў гістфака, іх перамозе папярэднічаў доўгі перыяд якаснай падрыхтоўкі. Гэтая перамога для каманды знакавая: 10 гадоў таму «пярвічка» факультэта заняла другое месца. Таму праца ў гэтым годзе пачалася з пастаноўкі мэты: мы едзем перамагчы! Удзельнікаў каманды вельмі згуртавала сумесная падрыхтоўка: яны разам уручную шылі і распісвалі сцяг, прыдумвалі крычалкі, здымалі візітоўку і распрацоўвалі праект.
Некаторыя факультэты былі адзначаны наступнымі намінацыямі конкурсу «Стань найлепшым!»: «Самая яркая каманда» і «Найлепшы інфармацыйны стэнд» – эканамічны факультэт; «Найлепшая група ў сацыяльных сетках» – ФФСН; «Найлепшая дакументная папка» – гістарычны факультэт.
Ганна КАЗАКОВА
