Дынастыю Давыдзенкаў складаюць прафесары, дактары эканамічных навук, кандыдат навук, дацэнт, аўтары манаграфій і шэрагу навуковых публікацый. Агульны педагагічны стаж дынастыі Давыдзенкаў у БДУ складае 57 гадоў.
Давыдзенка Леанід Мікалаевіч – доктар эканамічных навук, прафесар. Педагагічны стаж у БДУ – 29 гадоў.
Нарадзіўся 14 жніўня 1941 года ў вёсцы Залатаміно Кармянскага раёна Гомельскай вобласці.
У 1959 г. з адзнакай скончыў Мінскі фінансавы тэхнікум. З 1960 па 1964 г. служыў на Чарнаморскім флоце СССР у Крыме (г. Севастопаль, г. Феадосія). У 1972 г. скончыў Беларускі дзяржаўны ўніверсітэт, па спецыяльнасці эканаміст. З гэтага ж года з’яўляўся выкладчыкам палітычнай эканоміі. З 1972 г. па 1975 г. навучаўся ў аспірантуры. У 1975 годзе абараніў кандыдацкую дысертацыю на тэму «Сацыяльна-эканамічная эфектыўнасць аграрна-прамысловага кааперавання». У 1989 годзе абараніў доктарскую дысертацыю у Акадэміі грамадскіх навук пры ЦК КПСС (г. Масква) на тэму «Аграмаджванне працы і фарміраванне работніка-гаспадара ва ўмовах шматстайнасці формаў уласнасці». У 1991 г. рашэннем Дзяржаўнага камітэта СССР па народнай адукацыі было прысвоена навуковае званне прафесара.
З 1976 па 1978 гг. – лектар Мінскага абкама КПБ, а з 1978 па 1984 гг. – інструктар аддзела навукі і навучальных устаноў ЦК КПБ.
З 1984 па 1987 гг. – прарэктар па вячэрнім і завочным навучанні Беларускага дзяржаўнага ўніверсітэта імя У. І. Леніна, а з 1991 па 1997 гг – загадчык кафедры эканамічных навук.
З 1997 па 2000 гг. – галоўны савенік групы саветнікаў Прэм’ер-міністра Рэспублікі Беларусь.
З 2000 да лістапада 2013 гг. – загадчык кафедры эканамічнай тэорыі і эканамічнага выхавання БДПУ імя Максіма Танка, з 2013 па 2015 гг. – загадчык кафедры эканомікі БДПУ імя Максіма Танка, з 1 верасня 2015 г. – прафесар кафедры міжнароднага турызму факультэта міжнародных адносін Беларускага дзяржаўнага ўніверсітэта.
Аўтар больш чым 450 навуковых і метадычных прац, шэрагу манаграфій і падручнікаў у галіне эканамічнай тэорыі, істытуцыянальнай рынкавай эканомікі. Суаўтар фундаментальных навуковых прац: «Беларуская энцыклапедыя» (т. 5, 1997 г.; т. 10, 2000 г.); «Дзяржаўнае рэгуляванне сацыяльна-эканамічных адносін» (1996 г.); «Асноўная ідэалогія беларускай дзяржавы» (2004 г.); «Мінск і мінчане: дзесяць стагоддзяў гісторыі (да 940-годдзя горада)» (2008 г.); «Беларусь: Людзі. Стан. Час» (2009 г.); «Духоўна-маральнае выхаванне на аснове нацыянальных культурна-гістарычных і рэлігійных традыцый і каштоўнасцяў» (2010 г.).
З’яўляўся навуковым кіраўніком 14 эканамічных праектаў эканомікі ведаў. Узначальваў навуковыя праекты: «Права ўласнасці на прыродныя рэсурсы і іх эканамічная ацэнка ў Рэспубліцы Беларусь», «Прымежнае супрацоўніцтва: эканамічныя і істытуцыянальныя асновы», «Інвестыцыі ў сацыяльнае прадпрымальніцтва: бар’еры і перспектывы ў сучасных умовах (на прыкладзе Расіі і Рэспублікі Беларусь)» і інш.
Навуковы рэдактар і суаўтар 10 падручнікаў для студэнтаў ВНУ, выпушчаных з грыфам Міністэрства адукацыі Рэспублікі Беларусь. Пад яго кіраўніцтвам распрацаваны навукова абгрунтаваныя метадычныя рэкамендацыі па інвеставанні ў інавацыйныя праекты, сацыяльным прадпрымальніцтве, эканамічнай тэорыі і кіраванні інтэлектуальнай уласнасцю, міжнародным турызме.
Леанід Мікалаевіч з’яўляўся членам экспертнага савета Вышэйшай атэстацыйнай камісіі (ВАК) СССР па эканамічнай тэорыі і сусветнай гаспадарцы, ВАК Беларусі. З’яўляўся членам экспертнага складу Беларускага рэспубліканскага фонду фундаментальных даследаванняў, экспертнага савета па аналізе праектаў фундаментальных даследаванняў у эканоміцы Міністэрства адукацыі Рэспублікі Беларусь. Быў членам саветаў па абароне доктарскіх і кандыдацкіх дысертацый пры Беларускім дзяржаўным універсітэце, Беларускім дзяржаўным эканамічным універсітэце, НДЭІ Міністэрства эканомікі.
Падрыхтаваў 3 дактароў і 15 кандыдатаў навук. Узнагароджаны 2 медалямі СССР «За працоўнае адрозненне» і «Працоўную доблесць» (1971 г.), Ганаровай граматай Нацыянальнага сходу Рэспублікі Беларусь (2011 г.), знакам «Выдатнік адукацыі» і іншымі ганаровымі граматамі.
Алгарытм сямейнага жыцця Леаніда Мікалаевіча таксама вызначыўся ў камітэце камсамола Беларускага дзяржаўнага ўніверсітэта.
Давыдзенка Алена Леанідаўна – доктар эканамічных навук, прафесар (дачка Давыдзенкі Л. М.) Педагагічны стаж у БДУ – 26 гадоў.
У 1992 г. скончыла Беларускі дзяржаўны ўніверсітэт па спецыяльнасці «палітычная эканомія». У 1997 г. абараніла кандыдацкую дысертацыю на тэму «Механізм павышэння эфектыўнасці замежнаэканамічнай дзейнасці Рэспублікі Беларусь: на прыкладзе замежнаэканамічных сувязяў з Расіяй» у НДЭІ Міністэрства эканомікі Рэспублікі Беларусь.
З 1998 г. дацэнт кафедры міжнародных эканамічных адносін факультэта міжнародных адносін БДУ. У 2010 г. абараніла доктарскую дысертацыю на тэму: «Знешнегандлёвая палітыка краін з малой эканомікай ва ўмовах лібералізацыі міжнароднай гандлёвай сістэмы» ў БДЭУ. З 2011 г. прафесар кафедры міжнародных эканамічных адносін факультэта міжнародных адносін БДУ. У 2012 г. Алене Леанідаўне было прысвоена навуковае званне прафесара.
Аўтар больш чым 300 навуковых і навучальна-метадычных публікацый, сярод якіх 13 навучальных дапаможнікаў, 6 з якіх рэкамендаваны Міністэрствам адукацыі Рэспублікі Беларусь, 8 манаграфій, 12 публікацый выдадзена за мяжой (за межамі СНД) (у Грузіі, Польшчы, ЗША). Падрыхтавала 6 кандыдатаў навук па спецыяльнасці «сусветная эканоміка».
Удзельнічала ў працы доктарскіх саветаў па абароне дысертацый па эканамічных спецыяльнасцях у Беларускім дзяржаўным універсітэце, Беларускім дзяржаўным эканамічным універсітэце, Акадэміі кіравання пры Прэзідэнце Рэспублікі Беларусь
З 2017 г. член экспертнага савета па эканамічных навуках ВАК Рэспублікі Беларусь
Прафесар Давыдзенка А. Л. з’яўлялася адказным выканаўцам Рэспубліканскай комплекснай мэтавай праграмы «Навуковае абгрунтаванне механізму росту канкурэнтаздольнасці беларускай эканомікі ва ўмовах інтэрнацыяналізацыі і рэгіянальнай эканамічнай інтэграцыі» на 2011–2015 гг. Удзельнічала ў падрыхтоўцы «Нацыянальнай праграмы развіцця экспарту Рэспублікі Беларусь на 2011–2015 гг.» у складзе навуковага калектыву. Навуковы кіраўнік гранта Міністэрства адукацыі Рэспублікі Беларусь на 2013–2014 гг. «Сацыяльны капітал у інавацыйным развіцці еўрапейскіх краін з малой эканомікай». Адказны выканавец навуковай тэмы на замову Еўразійскай эканамічнай камісіі сумесна з калектывам Фінансавага ўніверсітэта пры ўрадзе Расійскай Федэрацыі «Фарміраванне грашова-крэдытных і валютных механізмаў забеспячэння фінансавай стабільнасці і эканамічнага росту з улікам перспектыў развіцця інтэграцыі ЕАЭС» на 2015–2016 гг. Навуковы кіраўнік тэмы «Сучасныя тэндэнцыі ў развіцці глабальнай лічбавай эканомікі» ДПНД Рэспублікі Беларусь на 2021–2025 гады.
Член рэдакцыйнай калегіі часопісаў «Эканоміка» Беларускага дзяржаўнага ўніверсітэта, «Мытны веснік», «Веснік Інстытута эканомікі НАН Беларусі», рэдакцыйнай калегіі «Часопіса міжнароднага права і міжнародных адносін». Член навуковага савета па ДПНД секцыі «Эканоміка» ў Інстытуце эканомікі НАН Беларусі.
Прафесар Давыдзенка А. Л. з’яўляецца лаўрэатам прэміі Нацыянальнай акадэміі навук Рэспублікі Беларусь сярод маладых навукоўцаў за цыкл прац «Праблемы знешнеэканамічнай дзейнасці Рэспублікі Беларусь і асаблівасці інтэграцыі эканомікі рэспублікі ў сістэму светагаспадарчых сувязяў» (2002 г.). Стала лаўрэатам прэміі імя У. І. Пічэты БДУ ў намінацыі «Адукацыя» ў 2020 г. за цыкл прац на тэму «Краіны з малой эканомікай у сістэме міжнародных эканамічных адносін ва ўмовах інтэлектуалізацыі, экалагізацыі і лічбавізацыі сусветнай эканомікі». Узнагароджана шэрагам ганаровых грамат БДУ і Інстытута эканомікі НАН Беларусі.
Давыдзенка Дзмітрый Леанідавіч – кандыдат юрыдычных навук, дацэнт, дактарант (сын Давыдзенкі Л. М.) Педагагічны стаж у БДУ – 2 гады.
У 2001 г. скончыў Маскоўскі дзяржаўны інстытут міжнародных адносін (МДІМА) па спецыяльнасці «грамадзянскае права; прадпрымальніцкае права; сямейнае права; міжнароднае прыватнае права». У 2004 г. абараніў у МДІМА дысертацыю на суісканне навуковай ступені кандыдата юрыдычных навук на тэму «Сусветная дамова як сродак урэгулявання прыватнаправавых спрэчак (па праве Расіі і некаторых замежных краін)» (спецыяльнасць 12.00.03). З лістапада 2022 г. дацэнт і вядучы навуковы супрацоўнік кафедры міжнароднага права ФМА Беларускага дзяржаўнага ўніверсітэта. З’яўляецца сертыфікаваным юрыстам.
Аўтар 2 манаграфій, суаўтар падручніка па медыяцыі, а таксама больш чым 100 навуковых артыкулаў і частак у манаграфіях на рускай, англійскай і нямецкай мовах.
Удзельнічаў у рэфармаванні прадпрымальніцкага права Казахстана (2018) у якасці эксперта па праве Расіі.
Мае досвед юрыдычнай практыкі ў Расіі і іншых краінах з 2004 г. у сферы камерцыйнага права, судовага і арбітражнага разгляду з замежным элементам (тэлекамунікацыі, страхаванне, паліўна-энергетычны комплекс, сельская гаспадарка, банкаўская дзейнасць, іншыя сферы прадпрымальніцтва); у тым ліку ў якасці арбітра ў міжнародных арбітражах, у тым ліку па рэгламентах Міжнароднай гандлёвай палаты, Міжнароднага камерцыйнага арбітражнага суда і Марской арбітражнай камісіі пры Гандлёва-прамысловай палаце РФ (ГПП РФ), Расійскага арбітражнага цэнтра, а таксама эксперта па пытаннях расійскага і міжнароднага гандлёвага права ў замежных судах і міжнародных арбітражах.
У 2017–2019 г. працаваў галоўным экспертам Цэнтра арбітражу і пасярэдніцтва ГПП РФ і адказным сакратаром Марской арбітражнай камісіі (МАК) пры ГПП РФ.
У 2019–2022 г. працаваў дацэнтам кафедры міжнароднага прыватнага і грамадзянскага права МДІМА.
У 2020–2022 гг. – выканаўчы сакратар экспертна-метадычнага савета Арбітражнай камісіі расійскага камітэта Міжнароднай гандлёвай палаты (ICC Russia).
Член кіравання Цэнтра медыяцыі пры Асацыяцыі юрыстаў Расіі.
Уключаны ў спіс найлепшых спецыялістаў у сферы міжнароднага камерцыйнага арбітражу ва ўзросце да 45 гадоў у 2017–2022 гг. (міжнароднае рэйтынгавае агенцтва Who’s Who Legal і Global Arbitration Review), у 2022 г. – у якасці аднаго з глабальных лідараў (Global leaders).
Уваходзіць у рэкамендаваныя спісы арбітраў Расійскага арбітражнага цэнтра, Ганконскага міжнароднага арбітражнага цэнтра (HKIAC), Арбітражнага цэнтра паўднёвага Кітая (SCIA), калегій Арбітражнага цэнтра РСПП па міжнародных і транспартных спрэчках, Казахстанскага міжнароднага арбітражу, Палаты арбітраў (Мінск) і іншых арбітражных устаноў.
Член кансультацыйнага савета Міжнароднага цэнтра акадэмічных прававых даследаванняў (Індыя).
Ад’юнкт-савввветнік Ex Curia International міжнароднага цэнтра па даследаванні практыкі альтэрнатыўных спосабаў вырашэння спрэчак (ADR).
Член рэдакцыйнага савета часопіса Палаты арбітраў пры Саюзе юрыстаў Рэспублікі Беларусь Chamber of arbitrators і рэдакцыйнай калегіі часопіса Гандлёва-прамысловай палаты РФ «Камерцыйны арбітраж».
Дынастыя Давыдзенкаў вядомая высокімі дасягненнямі ў розных напрамках навуковай, даследчай, выкладчыцкай дзейнасці. Прадстаўнікі дынастыі ўслаўляюць Беларускі дзяржаўны ўніверсітэт і за межамі краіны.
Дар’я АРТАМОНАВА
