Штогод наш універсітэт выпускае сотні замежных студэнтаў. Нехта з іх застаецца і знаходзіць сваё месца ў Беларусі, нехта з’язджае. Але дзе б выпускнікі ні знаходзіліся, кожны з іх памятае альма-матар. Двое выпускнікоў расказалі, як склалася іх жыццё пасля таго, як яны атрымалі адукацыю ў нашай краіне.
Лейлі Джумакулыева родам з сонечнага Туркменістана. Яна скончыла філфак у 2023 годзе па спецыяльнасці «рамана-германская філалогія».
У Мінску ў дзяўчыны вучыліся сваякі і знаёмыя. Пра наш універсітэт Лейлі даведалася ад іх, таму і вырашыла паступаць. Яе бацькі ведалі, што ў Беларусі высокая якасць адукацыі, і падтрымалі рашэнне дачкі. Аддаецца ўспамінам Лейлі паэтычна. Мінск застаўся ў яе памяці менавіта такім:
– Уяўляю залатую восень, калі паветра прасякнута свежасцю і водарам апалага лісця. Ты сядзіш на лаўцы ва ўніверсітэцкім парку з сябрамі, смеючыся з чагосьці зусім дурнога, але бясконца дарагога. Або цёплы летні вечар – апошні іспыт здадзены, і горад раптам здаецца бясконца вялікім і поўным магчымасцяў…
Дзяўчына лічыць, што БДУ не проста ўніверсітэт. Гэта месца, дзе ты сталееш, вучышся верыць у сябе і шукаць сваё месца ў свеце. І нават праз гады ён застаецца ў памяці не як будынак або аўдыторыі, а як важны раздзел у кнізе жыцця.
З універсітэцкімі сябрамі Лейлі камунікуе праз сацыяльныя сеткі. Па магчымасці сустракаецца.
– БДУ як універсітэт пакінуў у маім жыцці не толькі веды, атрыманыя на лекцыях, але і нешта большае. Ранішнія прабежкі па шырокіх калідорах, калі спазняешся на першую пару, або доўгія вечары ў бібліятэцы, дзе старонкі падручнікаў пахнуць крыху выцвілай паперай і гісторыяй пакаленняў. Гэта ўтульныя размовы з выкладчыкамі, якія аднойчы сказалі нешта простае, але яно перавярнула погляд на прафесію і жыццё, – летуценна ўспамінае выпускніца. – Гэта сябры, якія прайшлі разам увесь шлях – ад першай сесіі да апошняга іспыту. Гэта адчуванне свабоды, калі пасля лекцый можна блукаць па старых вулачках Мінска і марыць пра паспяховую будучыню.
Пасля вучобы дзяўчына вярнулася на радзіму. Там яна некаторы час працавала выкладчыцай англійскай мовы ў адукацыйным цэнтры. У кастрычніку 2023 года даведалася, што ёсць квота для атрымання адукацыі ў Расіі, падала дакументы і паступіла ў магістратуру.
Цяпер Лейлі вучыцца ў магістратуры ў Маскоўскім дзяржаўным лінгвістычным універсітэце, у Інстытуце міжнародных адносін і сацыяльнапалітычных навук. Выпускніца дзеліцца, што галоўныя навыкі, якія ў яе з’явіліся падчас вучобы ў Беларускім дзяржаўным універсітэце, гэта ўпарта вучыцца і не баяцца ўдзельнічаць у розных мерапрыемствах. Актыўная грамадская дзейнасць дапамагла дзяўчыне і ў паступленні. У конкурсе ўлічваліся адзнакі, падзякі, дасягненні ў БДУ, характарыстыка. Цяпер гэта дазваляе Лейлі бясплатна вучыцца ў Маскве і атрымліваць стыпендыю. Дзяўчына ўжо паспяхова закрыла першую сесію, адначасова з вучобай праходзіць практыку і працуе ў бізнес-цэнтры.
– Працягвайце вучыцца — універсітэт дае моцную аснову і веды. Развівайце навыкі, нават калі гэта выходзіць за рамкі вашай спецыяльнасці. Бярыце максімум ад студэнцкага жыцця: удзельнічайце ў канферэнцыях, стажыроўках, конкурсах. Гэта не проста радкі ў рэзюмэ, а рэальны вопыт і знаёмства з вашай прафесіяй, – раіць Лейлі будучым выпускнікам. – Будзьце гнуткімі: свет мяняецца, і адна прафесія на ўсё жыццё не заўсёды канчатковы варыянт. Вучыцеся адаптавацца, асвойваць новыя тэхналогіі і падыходы. Галоўнае не спыняцца.
Азамат Бабоеў скончыў факультэт міжнародных адносін у 2023 годзе. Яшчэ ў школьныя часы Азамату пра БДУ расказаў дзядзька, які заўсёды падкрэсліваў, што гэта выдатны выбар для атрымання якаснай адукацыі. Ніхто са сваякоў хлопца не вучыўся ў Беларусі, але краіна вабіла юнака сваёй культурай, прыязнымі людзьмі і высокім узроўнем адукацыі. Тады Азамат здаў іспыты ў Таджыкістане і на агульных падставах паступіў на факультэт міжнародных адносін, на бюджэтную форму навучання.
У БДУ Азамат быў актывістам. У 2022/2023 навучальным годзе ён займаў пасаду старшыні савета зямляцтваў.
– Гэты перыяд мне запомніўся мерапрыемствамі, якія мы праводзілі ва ўніверсітэце. Наша нацыянальнае свята Наўруз, спартыўныя мерапрыемствы, наведванне дзіцячых дамоў, удзел у розных канферэнцыях і дыялогавых пляцоўках…
Пасля навучання Азамат вярнуўся дадому ў Таджыкістан. Нягледзячы на тое, што малады чалавек вучыўся за мяжой, ён заўсёды хацеў пасля заканчэння ўніверсітэта будаваць сваё жыццё на радзіме. Першы год пасля выпуску ён працаваў не па спецыяльнасці, а ў сферы бізнесу. А з гэтага года ўладкаваўся на працу ў філіял міждзяржаўнай тэлерадыёкампаніі «МІР» у Душанбэ. Там жа выпускнік знайшоў сваё каханне, ажаніўся, і хутка стане бацькам.
Беларусь пакінула ў Азамата шмат цёплых успамінаў. Ён вельмі палюбіў яе за час свайго навучання і быў бы рады вярнуцца, каб наведаць сваіх сяброў і больш даведацца пра краіну. Выпускнік лічыць, што гэта выдатная магчымасць працягваць падтрымліваць сувязі са знаёмымі.
Паколькі Азамат па спецыяльнасці дыпламат, вопыт ён атрымліваў не толькі на вучобе, але і ў грамадскім жыцці. Ён быў куратарам студэнтаў з Таджыкістана, якія вучыліся ў Беларусі. Дзякуючы яго актыўнай дзейнасці ва ўніверсітэце і за межамі, выпускнік быў узнагароджаны дыпломам Камітэта па справах моладзі і спорту Рэспублікі Таджыкістан.
– Будучым выпускнікам БДУ я хацеў бы пажадаць настойлівасці і ўпэўненасці ў сабе. Не бойцеся марыць і ставіць высокія мэты, бо шлях да поспеху – гэта не імгненнае дасягненне, а штодзённая праца і самаразвіццё. Вашы веды і навыкі – важны падмурак, але не менш важна атачаць сябе людзьмі, якія падтрымаюць і дапамогуць у цяжкія моманты. Сакрэт поспеху ў тым, каб не спыняцца на дасягнутым, заўсёды імкнуцца да большага і, нягледзячы на перашкоды, ісці наперад. Памятайце, што нават самыя вялікія мэты можна ажыццявіць, калі дзейнічаць з рашучасцю і верай у сябе.
Ганна КАЗАКОВА
