26 красавіка студэнцкі савет па якасці адукацыі зладзіў круглы стол «Рэйтынгавая сістэма ацэньвання ў БДУ». Асноўным спікерам была начальнік Галоўнага ўпраўлення вучэбнай і навукова-метадычнай работы Людміла ХУХЛЫНДЗІНА, апаніраваў ёй прадстаўнік ССЯА Ігар ДУБАНОС. Акцэнт сустрэчы быў звернуты ў бок новай рэдакцыі Кодэкса аб адукацыі Рэспублікі Беларусь, які зараз узгадняецца ва ўрадзе.
Неаднолькавыя каэфіцыенты на факультэтах
Рэйтынгавая сістэма працуе ў БДУ досыць даўно. Сутнасць яе ў тым, што фінальная адзнака, якую атрымлівае студэнт у залікоўку, складаецца з адзнакі за семінарскія, лабараторныя заняткі і адзнакі за адказ на экзамене. Ідэя ў тым, каб зменшыць уплыў выпадковых фактараў на ацэнку ведаў навучэнца. Хіба не можа студэнт прыйсці на экзамен хворым ці з-за іншых надзвычайных абставін падрыхтавацца дрэнна? Раней ён атрымаў бы дрэнную адзнаку ў залікоўку. Зараз жа, калі студэнт вучыўся ў семестры добра, яго адзнака часткова кампенсуецца. Або адваротная сітуацыя. Студэнт мінімальна наведваў практычныя заняткі і лекцыі, ледзь атрымаў допуск да экзамену, прыйшоў здаваць. Яму пашанцавала: трапіўся білет, які студэнт дасканала ведае. Раней ён атрымаў бы добрую адзнаку, але зараз праз уплыў адзнак за семестр канчатковая адзнака пагоршыцца. Каэфіцыенты ўплывовасці адміністрацыя факультэтаў можа вызначаць па ўласным меркаванні. У суме атрымліваецца 1. Напрыклад, 0,5 бягучая адзнака + 0,5 экзаменацыйная адзнака, ці 0,4 + 0,6 адпаведна, ці неяк інакш.
«Вы можаце спытаць: чаму мы не вызначыліся адразу, чаму нельга зрабіць аднолькавыя каэфіцыенты па ўсім універсітэце? Надта шмат было спрэчак з гэтай нагоды. Я лічу, што гэтага рабіць нельга, бо ў нас неаднародная ВНУ. Розныя дысцыпліны, розныя формы справаздачнасці, розныя факультэты… Але, напрыклад, я ведаю, што ФПМІ прыняў адназначнае рашэнне на савеце факультэта, які працэнт будзе складаць бягучая адзнака, а які – экзаменацыйная. На іншых факультэтах рашэнне прымаюць на кафедрах. Дзе вельмі вялікая колькасць семінарскіх, практычных або лабараторных заняткаў, значнасць бягучай адзнакі, як правіла, вышэйшая», – растлумачыла Людміла ХУХЛЫНДЗІНА.
«Аўтаматы»легалізавалі
Так званыя «аўтаматы» да гэтага часу ставіліся паўлегальна, бо гэтая працэдура не была прапісаная ў афіцыйных дакументах, але з нядаўняга часу яе ўсё ж легалізавалі. Трэба памятаць, што не ўсе прадметы можна здаць аўтаматычна. Людміла ХУХЛЫНДЗІНА раіць не выкарыстоўваць гэтую працэдуру там, дзе курс не перакрываецца ўсімі заняткамі і застаецца частка для самастойнага вывучэння.
«Існуе неабходнасць скарачэння колькасці лекцыйных заняткаў і павелічэння практыкі. Ёсць кнігі, ёсць інфармацыйныя матэрыялы, якія можна знайсці (у інтэрнэце). Пераказваць падручнік няма сэнсу», – адзначыла начальнік ГУНВМР падчас размовы пра новыя вучэбныя планы.
Факультатывы не абавязковыя
Людміла Хухлындзіна нагадала, што факультатывы, у адрозненне ад курсаў па выбары, не абавязковыя і ніхто не можа прымусіць на іх запісвацца. Максімальная колькасць залікаў на адзін семестр – 6 (+1 залік па фізкультуры). Але калі студэнт запісаўся на факультатыў, то ён павінен здаваць залік і па яго курсе нават звыш максімуму. Так можа выйсці і 8, і 9 залікаў. Таму варта добра ацэньваць свае сілы, калі запісваешся на дадатковыя курсы. Зразумела, трэба ўлічваць, што факультатыў – гэта тая паслуга, якую ўніверсітэт прапануе бясплатна.
Рэйтынгавая сістэма яшчэ не паўсюль
Як высветлілася, юрыдычны каледж у складзе БДУ застаўся без рэйтынгавай сістэмы і вымушаны працаваць па старой схеме, бо падпарадкоўваецца Палажэнню аб сярэдніх навучальных установах. У зале пацікавіліся: ці распаўсюдзіцца рэйтынгавая сістэма на юркаледж у найбліжэйшы час? «Гэта залежыць перш за ўсё ад кіраўніцтва юрыдычнага каледжа, – адказвае газеце начальнік ГУНВМР. – Яны павінны распрацаваць адпаведнае палажэнне».
Сустрэча працягвалася гадзіну дваццаць, акурат як пара. Калі пытанні скончыліся, Людміла Міхайлаўна падкрэсліла, што як начальнік Галоўнага ўпраўлення вучэбнай і навукова-метадычнай работы яна не закрытая, прымае студэнтаў з іх прапановамі і праблемамі.
Віталь АРЭШКА
