Якія ідэі рэалізуе праект FABLAB на мехмаце БДУ для падтрымкі моладзевага прадпрымальніцтва? [+відэа]

Ствараць сеткавую інфраструктуру для падтрымкі інавацыйнага прадпрымальніцтва моладзі на платформах вытворчых лабараторый – на гэта накіравана праца праекта FABLAB. Майстэрня дае ўсім ахвотнікам магчымасць індывідуальнага самастойнага вырабу неабходных ім прадуктаў ці дэталяў.

Сёлета ў ліпені на базе кафедры тэарэтычнай і прыкладной механікі і НДЛ «Прыкладная механіка» механіка-матэматычнага факультэта БДУ сумесна з аддзелам міжнародных праграм і праектаў УМС была адкрыта вытворчая лабараторыя FABLAB.

– Праект FABLAB мае вытокі ў стартап-цэнтры па развіцці і прасоўванні інавацый студэнтаў SUCSID, праграме TEMPUS. Ён рэалізоўваўся кансорцыумам партнёраў з краін ЕС і СНД, – тлумачыць менеджар праекта FABLAB Васіліна РАМАНЕНКАВА, спецыяліст аддзела міжнародных праграм і праектаў. – Пазней амаль тым жа кансорцыумам быў створаны праект FABLAB у якасці лагічнага працягу атрыманага досведу, перанесенага на новы напрамак.

FABLAB накіраваны на распрацоўку асяроддзя, якое будзе сты­муляваць інжынерную творчасць і прадпрымальніцкую дзейнасць, таксама ён паспрыяе працаўлад­каванню моладзі з дапамогай сеткавай інфраструктуры ўзаемадзеяння ўніверсітэтаў, бізнесу і прамысловасці на платформах выт­ворчых лабараторый. Працягласць праекта – 3 гады.

Сяргей Хвясеня і Васіліна Раманенкава

– FABLAB была адкрыта Нілам Гершэнфельдам амаль 20 гадоў назад у цэнтры бітаў і атамаў Ма­сачусецкага тэхналагічнага інстытута (ЗША). Універсітэцкі праект, які першапачаткова прадугледжваў навучанне працы не­вялікай групы студэнтаў на наяўным у цэнтры вытворчым аб­сталяванні, ператварыўся ў глабальную сетку лабараторый, якія падзяляюць агульныя прынцыпы, выкарыстоўваюць падобнае аб­сталяванне і тэхналогіі, абмень­ваюцца ідэямі і рэсурсамі, – распавёў кіраўнік працоўнай групы праекта FABLAB Сяргей ХВЯСЕНЯ, загадчык НДЛ «Прыкладная механіка» кафедры тэарэтычнай і прыкладной механікі.

– Праект FABLAB атрымаў адабрэнне Еўрапейскай камісіі ў кастрычніку 2015 года, – працягвае Васіліна Раманенкава. – А пасля праходжання працэдуры рэгістрацыі ў Міністэрстве эканомікі з мая 2016 года пачаліся мерапрыемствы па рэалізацыі праекта ў Беларусі.

Абсталяванне лабараторыі

Па словах кіраўніка праекта, у лабараторыі можна стварыць для сябе адзін унікальны прадмет, а таксама выпусціць дробную партыю чаго-небудзь дзякуючы сучаснаму абсталяванню, якое ёсць у лабараторыі. Гэта тры 3D-прынтары, 3D-сканеры, лазерны гравёр і шэраг дадатковых прыкладных інструментаў з праграмным забеспячэннем для шліфавання, зборкі і іншых аперацый.

3D-прынтар Flashforge Dreamer

Прынтары дазваляюць ствараць суцэльныя трохмерныя аб’екты рознай геаметрычнай формы на аснове лічбавай мадэлі. 3D-сканаванне ажыццяўляе аўтаматычны збор і аналіз дадзеных патрэбнага аб’екта, яго формы, колеру і іншых характарыстык з наступным пераўтварэннем у лічбавую трохмерную мадэль. Лазерны гравёр апрацоўвае гатовыя мадэлі і матэрыялы, наносіць выявы на паверхню і паляпшае канструкцыі аб’ектаў.

Дарэчы, на ММФ ужо вядуцца буйныя фундаментальныя і прыкладныя навуковыя працы па геа­механіцы, механіцы машын і механізмаў, трыбафатыцы, біямеха­ніцы, якія патрабуюць выкарыс­тання 3D-прынтавання.

– Пакуль у БДУ ў працы FABLAB задзейнічана каля 10 студэнтаў, магістрантаў, аспірантаў і выкладчыкаў, – кажа Сяргей Хвясеня. – Усе ахвотнікі могуць скарыстацца гэтымі тэхнічнымі рэсурсамі, каб рэалізаваць прыкладныя праекты ў рамках выканання курсавых, дыпломных, навуковых прац, навукова-тэхнічных даследаванняў.

Кансорцыум праекта

У агульнай праграме задзейнічаны навучальныя ўстановы некалькіх краін. Сярод іх: Фонд бізнес-інкубатараў Зеландыі (Данія), Універсітэт Валенсіі (Іспанія), Грэта дэ Велей (Францыя), Генцкі ўніверсітэт (Бельгія), Вышэйшая школа менеджменту (Партугалія), ІРАДЫЯРЭ (Партугалія), ІПСА.

3D-сканер Einscan-Pro

Нацыянальнага тэхнічнага ўніверсітэта Украіны «КПІ» (Украіна), Харкаўскі нацыянальны эканамічны ўніверсітэт (Украіна), Цярнопальскі нацыянальны тэхнічны ўніверсітэт (Украіна), Навукова-тэхналагічны парк БНТУ «Палітэхнік». А Новы ўніверсітэт Бакінгемпшыра (Вялі­кабрытанія) выступае ў ролі каардынатара праекта.

Пры выкананні першых крокаў праекта быў праведзены аналіз наяўнага досведу працы і кіравання фаблабамі ў ЕС і партнёрскіх краінах. Як дзеляцца кіраўнікі праекта, сумесна з пазначанымі ўстано­вамі праводзіцца шэраг трэнінгаў, сустрэч і семінараў.

Характэрна тое, што на аснове навучальных трэнінгаў былі распрацаваны і знаходзяцца на ўзгадненні з каардынатарам навучаль­ныя курсы па па комплексе тэматык FABLAB: «Хуткае прататыпаванне і вытворчасць», «Тэорыя рашэння вынаходніцкіх задач», «3D-мадэляванне і праектаванне», «Кіраванне фаблаб-праектамі» і «Распаўсюджанне на рынку». Плануецца ўвесці іх у навучанне ў якасці спецкурсаў.

3D-прынтар Flashforge Finder

Якія вынікі чакаюцца?

У планах – праводзіць трэнінгі і майстар-класы для школьнікаў і студэнтаў, выйсці на шматсерыйную вытворчасць, узаемавыгадныя фінансавыя адносіны з заказчы­ка­мі, партнёрамі-стартапамі. Папя­рэднія дамоўленасці ёсць, адзна­чае кіраўнік праекта.

3D-прынтар Creatbot DX+

– Удзел у дадзеным праекце спрыяе пашырэнню ведаў і кампетэнцый, якія ёсць у БДУ, па розных напрамках FABLAB, – лічыць Сяргей Хвясеня. – Гэта пераламленне ідэй і кампетэнцый выкладчыкаў  і навучэнцаў у рэальныя бізнес-праекты. Яны могуць выйсці на прамысловыя ўзоры і вытворчасць поўнага цыкла.

– Праект завершыцца ў 2019 г. для Еўрапейскай камісіі і групы БДУ ў тым ліку. Далей – устойлівае развіццё, усё тое, што створана і напрацавана, павінна запусціцца і працаваць. А менавіта зацвярджэнне спецкурсаў, плана далейшай працы і выкананне шэрагу ўжо пазначаных праектаў у кантэксце FABLAB, – удакладняе Ва­сіліна Раманенкава.

Кантакты

Усе навіны, публікацыі, анонсы і іншая карысная інфармацыя даступная на партале fablab-erasmus.eu і ў сацыяльнай сетцы Facebook: facebook.com/fablaberasmus.