Вольга Чупрыс – першая жанчына ў гісторыі БДУ на пасадзе прарэктара. Гэта паслужыла падставай для інтэрв’ю, якое мы ўзялі ў Вольгі Іванаўны для нашай газеты ў пачатку снежня. Пакуль нумар рыхтаваўся да друку, стала вядома пра яе прызначэнне на пасаду намесніка кіраўніка Адміністрацыі Прэзідэнта Рэспублікі Беларусь. Гэта ў чарговы раз пацвердзіла прызнанне прафесійных якасцяў Вольгі Чупрыс і высокі давер да нашага ўніверсітэта ў цэлым.
Мала хто ў дзяцінстве марыць стаць юрыстам, але…
– Спачатку мама бачыла ўва мне музычнага педагога, паколькі я паспяхова вучылася па класе фартэпіяна. Потым з такім жа захапленнем я займалася і лёгкай атлетыкай. Менавіта спартыўная падрыхтоўка сфарміравала важныя асабістыя якасці: сабранасць, настойлівасць, рашучасць, мэтанакіраванасць.
Я была выдатніцай у школе. Высокая паспяховасць, актыўная грамадская дзейнасць прадвызначылі мой прафесійны выбар. У старэйшых класах канчаткова вырашыла звязаць сябе з юрыспрудэнцыяй. Мама скончыла філалагічны факультэт БДУ. Таму я таксама абрала БДУ, юрыдычны факультэт – я лёгка паступіла, здаўшы, як медаліст, на выдатна ўсяго адзін экзамен. Сямейную эстафету прыняў мой старэйшы сын – ён таксама выпускнік юрыдычнага факультэта. Так БДУ стаў лёсавызначальным універсітэтам для маёй сям’і.
Цудоўны час
Студэнцтва запомнілася сваёй імклівасцю, павышанай адказнасцю да вучобы. Асноўную частку групы складалі студэнты з вопытам работы, а выпускнікоў школ, у асноўным медалістаў, было няшмат. Мы, учарашнія школьнікі, хутка сталелі ў такім асяроддзі. Нягледзячы на рознаўзроставасць, група была згуртаванай і дружнай. Да гэтага часу сустракаемся з аднакурснікамі і згадваем той цудоўны час.
Працоўная дзейнасць Вольгі Іванаўны Чупрыс у БДУ пачалася з 1997 года.
У 1998 годзе абараніла дысертацыю на суісканне вучонай ступені кандыдата юрыдычных навук на тэму: «Канстытуцыйна-прававыя праблемы грамадзянства ў краінах Садружнасці Незалежных Дзяржаў: параўнальна-прававы аналіз».У 2010 годзе абараніла дысертацыю на суісканне вучонай ступені доктара юрыдычных навук на тэму: “Тэарэтычныя праблемы прававога рэгулявання дзяржаўнай службы Рэспублікі Беларусь». У 2016 годзе прысвоена вучонае званне прафесара.
У БДУ прайшла шлях ад выкладчыка юрыдычнага факультэта да прарэктара па вучэбнай працы і адукацыйных інавацыях БДУ (студзень 2018 г. – снежань 2019 г.).
Пра гендарную роўнасць і няроўнасць
Кіраўнік па традыцыі асацыіруецца з мужчынам. Але, думаю, не варта дзяліць кіраўнікоў, супрацоўнікаў на мужчын і жанчын. Любы кіраўнік, незалежна ад полу, абавязаны валодаць усімі патрэбнымі прафесійнымі кампетэнцыямі і асобаснымі якасцямі, мець арганізатарскія здольнасці, знаходзіць эфектыўнае рашэнне вытворчых задач, стратэгічна мысліць, правільна дэлегаваць паўнамоцтвы і ацэньваць вынікі. У супрацоўніках цаню адказнасць, дысцыплінаванасць, уменне чуць, працаваць у камандзе, знаходзіць кампраміс і прапаноўваць рашэнне праблемы.
БДУ – гэта ўніверсітэт вялікіх магчымасцяў
БДУ – гэта мая альма-матар, дзе я адбылася як выкладчык, навуковец і кіраўнік. Універсітэт з’яўляецца інтэлектуальным эпіцэнтрам нашай краіны, тут сабраліся ўнікальныя, цікавыя і вядомыя людзі, камунікацыя з якімі ўзбагачае, прыносіць велізарнае задавальненне і дае імпульс да многіх смелых рашэнняў. Побач з такімі людзьмі не стаіш на месцы, развіваешся.
Універсітэт – гэта студэнты, ад якіх заўсёды атрымліваеш пэўны зарад энергіі. Хочацца, каб наша моладзь прагла ведаў, была актыўнай у грамадскім, навуковым і спартыўным жыцці ўніверсітэта. БДУ валодае вялікімі магчымасцямі і ўмовамі для самарэалізацыі кожнага студэнта, але толькі пры асабістым жаданні і намаганнях самога навучэнца.
БДУ ў свой юбілейны перыяд выступае моцным лідарам па многіх паказчыках сярод рэспубліканскіх і замежных універсітэтаў. Хацелася б, каб ён і далей развіваўся, прырастаў добрымі студэнтамі, каб дружны калектыў не шкадаваў сваіх магчымасцяў і сіл. Лічу, мы заслугоўваем высокага статусу ў спісе найлепшых універсітэтаў дзякуючы вынікам, дасягнутым нашым працавітым і старанным калектывам.
Пра малую радзіму і самае асабістае
Вучаніца 3 класа СШ №2 Вольга Чупрыс
Я мінчанка, але малой радзімай лічу Лагойскі раён, адкуль родам бацькі. Менавіта там я праводзіла вакацыі ў бабуль, знаёмілася з прыгажосцю нашай беларускай прыроды, даведвалася ўсю спецыфіку сельскага жыцця. Непаўторны час, выдатныя ўспаміны: усё лета ездзіла на веласіпедзе, купалася ў рэчцы, чытала кнігі… Памятаю, як у суседняй школе іграла на фартэпіяна, а мясцовыя дзеці прыбягалі паглядзець у акенца і паслухаць мае кампазіцыі.
Сям’я – самае важнае ў жыцці кожнага чалавека. Я шчаслівая мама траіх сыноў. Старэйшы, як я ўжо казала, выбраў маю прафесію, скончыў юрфак БДУ, цяпер працуе ў пракуратуры. Сярэдні – будучы педыятр. А малодшы яшчэ вучыцца ў школе і на сёння бачыць сябе ў галіне IT. Вольны час праводжу з карысцю для сябе, гэта актыўныя віды спорту – лыжы, плаванне, бег. І, вядома ж, не ўяўляю свайго жыцця без кніг.
Жадаем Вользе Іванаўне моцнага здароўя, далейшай плённай дзейнасці, новых ідэй і дасягненняў на новай пасадзе.
Вольга Іванаўна Чупрыс з’яўляецца кіраўніком падгрупы групы экспертаў у галіне права пры Адміністрацыі Прэзідэнта Рэспублікі Беларусь, член Навукова-кансультатыўнага савета пры Вярхоўным Судзе. Супрацоўнічае з Нацыянальным цэнтрам заканадаўства і прававых даследаванняў Беларусі. Член грамадскага аб’яднання «Беларускі рэспубліканскі саюз юрыстаў”.
На новай пасадзе намесніка кіраўніка Адміністрацыі Прэзідэнта Вользе Іванаўне Чупрыс трэба будзе курыраваць пытанні заканадаўчага рэгулявання, арганізоўваць працу па карэкціроўцы Канстытуцыі Рэспублікі Беларусь.
Гутарыла Алена ЛЯЎШЭНЯ
