Сёлета для атрымання вышэйшай адукацыі на ўсе формы навучання ва ўніверсітэт паступілі 4617 абітурыентаў. Пры конкурсе 1,7 чалавека на месца на дзённую бюджэтную форму прынялі 2590 чалавек, на завочную – 104, а курсантамі ваеннага факультэта стаў 71 чалавек. Акрамя таго студэнтамі дзённай платнай формы навучання сталі 1498 маладых людзей, а завочнай платнай – 217. Тут конкурс склаў 1,64 чалавека на месца.
– Прыёмная кампанія 2024 года прынесла некалькі тэндэнцый. Першая – значны рост прахадных балаў, што пацвярджае матываванасць нашых абітурыентаў. Другая – павелічэнне прыёму на бюджэтную форму атрымання адукацыі на 459 месцаў, – адзначыў рэктар Андрэй Кароль.
Па яго словах, сярод гуманітарнага і сацыяльна-эканамічнага блока спецыяльнасцяў БДУ ў абі-
турыенцкім топе знаходзяцца такія напрамкі, як «сусветная эканоміка» (395 балаў), «эканамічная інфарматыка» (394), «міжнароднае права» і «міжнародныя адносіны» (390). Што тычыцца спецыяльнасцяў, якія ахопліваюць дакладныя і прыродазнаўчыя навукі, на першых пазіцыях «прыкладная інфарматыка» (391), «інфарматыка» (384), «кібербяспека» (378) і «хімія лекавых злучэнняў» (372). Цікава, што ў параўнанні з мінулым годам прахадныя балы павялічыліся на большасці спецыяльнасцяў. Так, напрыклад, на спецыяльнасць «фундаментальная і прыкладная біятэхналогія» прырост склаў 33 пункты, «хімію лекавых злучэнняў» – 23, «сусветную эканоміку» – 10. А самы высокі конкурс падчас прыёмнай кампаніі быў адзначаны на спецыяльнасцях факультэта сацыякультурных камунікацый «графічны дызайн і мультымедыядызайн» (19 чалавек на месца), «дызайн касцюма і тэкстылю» (8,5 чалавека) і «дызайн прадметна-прасторавага асяроддзя» (7,6 чалавека).
Традыцыйна ўнутраныя ўступныя іспыты прайшлі на пяці факультэтах (філалагічным, юрыдычным, гістарычным, журналістыкі, ФСК) і ў МДЭІ імя А. Д. Сахарава.
Без экзаменаў ва ўніверсітэт былі прыняты некалькі катэгорый абітурыентаў. Сярод іх – пераможцы міжнародных і рэспубліканскіх алімпіяд (80 чалавек), абітурыенты, якія паступалі на прыярытэтныя для эканомікі спецыяльнасці (132) і педагагічныя напрамкі (48), выпускнікі Ліцэя імя Ф. Э. Дзяржынскага БДУ (140), Нацыянальнага дзіцячага тэхнапарка (21), Сувораўскага вучылішча і кадэцкіх класаў (8). Агульная лічба залічаных без экзаменаў сёлета павялічылася больш чым на 30%.
Рэктар адзначыў, што 92 % прынятых абітурыентаў БДУ маюць больш за 300 балаў. Першакурснікамі ўніверсітэта сталі і два чатырохсотбальнікі. Больш чым на 20 % павялічылася колькасць залічаных медалістаў і абітурыентаў, што маюць дыпломы каледжаў з адзнакай. Сёлета іх 860 чалавек. Акрамя таго, 46,4 % усіх залічаных у БДУ (1201 чалавек) з’яўляюцца выпускнікамі ліцэяў і гімназій. А ў суме першакурснікі ўніверсітэта маюць 515 стабальных сертыфікатаў ЦТ і ЦЭ (найбольшая колькасць максімальных вынікаў па грамадазнаўстве (110) і
матэматыцы (106)).
На большасць факультэтаў БДУ сёлета былі пададзены і заяўкі на навучанне па мэтавым накіраванні. Усяго на гэта прэтэндаваў 181 выпускнік устаноў сярэдняй адукацыі. Адзначым, што 19 абітурыентаў з іх ліку скончылі школу з медалём, а палова мае сярэдні бал атэстата 9 і болей. Заказчыкамі кадраў выступілі арганізацыі з розных абласцей Беларусі. У топе галін, адкуль сёлета найбольшая колькасць мэтавых накіраванняў, знаходзяцца адукацыйныя структуры. Самыя буйныя сярод іх – упраўленне адукацыі Камітэта па адукацыі Мінгарвыканкама і Галоўнае ўпраўленне па адукацыі Мінаблвыканкама. Таксама зацікаўлены ў падрыхтоўцы маладых спецыялістаў прадпрыемствы «Інтэграл», «Планар», арганізацыі сілавых структур – Следчы камітэт, Дзяржаўны мытны камітэт, Міністэрства ўнутраных спраў.
– Сёлета назіраўся рост абітурыентаў з іншых краін. Традыцыйна гэта абітурыенты з Расіі, Кітая,
Туркменістана, Таджыкістана. У гэтым годзе ў БДУ паступілі прадстаўнікі Зімбабвэ, М’янмы, Турцыі. Таксама БДУ павысіў узровень экспарту адукацыйных паслуг. Па выніках бягучага квартала прыкладна на 30–40 % апярэджваем план, – кажа прарэктар па вучэбнай рабоце і інтэрнацыяналізацыі адукацыі Віктар Кочын.
Не абышоў увагай Віктар Паўлавіч і з’яўленне новых напрамкаў. У гэтым годзе ў БДУ адкрылі
спецыяльнасці «міжнародная канфлікталогія», «краіназнаўства і перакладчыцкая дзейнасць», а таксама «міжнародная лагістыка».
Прарэктар заўважыў, што ў 2025 годзе БДУ будзе набіраць на два новыя напрамкі – «інтэлектуальная электроніка» (на ФРКТ) і «міжнародная эканоміка і гандаль» (на эканамічным факультэце).
– У цэлым прыёмная кампанія гэтага года прайшла дастаткова спакойна і планамерна. Усе супрацоўнікі і валанцёры выклаліся напоўніцу, – падагульніў прарэктар.
У гэтым годзе чатырохсотбальнікамі, якія паступілі ў БДУ, сталі Дар’я Галамака і Руслан Хомчанка. Карэспандэнт газеты пазнаёмілася з імі.
Дар’я Галамака – выпускніца бабруйскай сярэдняй школы № 27 імя В. З. Харужай. Завяршыўшы вучобу з залатым медалём, дзяўчына вырашыла паступаць на эканамічны факультэт (спецыяльнасць «эканамічная інфарматыка»). Да ЦЭ і ЦТ дзяўчына рыхтавалася ў спакойным рытме: займалася самастойна і з рэпетытарамі, паўтараючы матэрыял непасрэдна перад самімі іспытамі.
Сваю ролю ў падрыхтоўцы адыграла і тое, што ў старэйшых класах Даша займала прызавыя месцы на алімпіядах па матэматыцы і англійскай мове. Таму апошнія гады больш увагі надавала заняткам па рускай мове. Вынікам сталі дыпломы I ступені абласнога і III ступені заключнага этапу Рэспубліканскай алімпіяды па прадмеце.
– БДУ займае годныя пазіцыі ў рэйтынгу УВА як ў Беларусі, так і ва ўсім свеце. Мяркую, што менавіта тут я змагу раскрыцца ў новай галіне і паказаць свае магчымасці, – кажа Дар’я. –Спецыяльнасць выбірала таму, што яна адначасова сумяшчае ў сабе элементы эканомікі, SMM, лічбавага маркетынгу і праграмавання. Ужо зараз чакаю пачатку студэнцкага жыцця. Упэўнена, што будучыя чатыры гады пройдуць на самым высокім узроўні: з новымі знаёмствамі, цікавымі мерапрыемствамі і карысным вопытам.
Руслан Хомчанка скончыў гомельскую гімназію імя Б. Паскаля. А дакументы ён аднёс у прыёмную камісію юрфака (спецыяльнасць «правазнаўства»). Дарэчы, тое, што ў будучыні ён хоча займацца юрыспрудэнцыяй, хлопец вызначыў для сябе яшчэ ў 9 класе. «На ўсе сто» на экзаменах Руслан здаў грамадазнаўства, рускую і французскую мовы. Сакрэт, па словах абітурыента, крыецца ў сістэматычнай падрыхтоўцы. Так, хлопец штотыдзень вырашаў тэсты мінулых гадоў па мовах. А грамадазнаўства штудзіраваў па падручніках за 9-11 класы.
Як і Дар’я, Руслан – удзельнік і пераможца алімпіяд: у 9 класе ён атрымаў дыплом III ступені на заключным этапе Рэспубліканскай алімпіяды па французскай мове, а ў 11 класе – дыплом III ступені на абласным этапе Рэспубліканскай алімпіяды па рускай мове і літаратуры.
– Правазнаўства дазваляе ў дастатковым аб’ёме пазнаёміцца з усімі галінамі права і, адпаведна,
знайсці сябе ў любой з іх, – перакананы чатырохсотбальнік. – Пасля юрыдычнага факультэта БДУ, як мне здаецца, перад выпускніком адкрываецца шмат прафесійных магчымасцяў.
Ірына ІВАШКА
